İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 464 Hüküm no: 448 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celep Üstüyan’ın sattığı koyun bedelinden Kasap Kıroğlu Mustafa Beşe’den altı yüz elli dokuz kuruş on para alacağı olduğu 569 guruş 10 para hüküm Ma‘rûz Celeb tâifesinden Üstüyan v. İstiko zimmî meclis-i şer‘-i hatîrde kalyo[n]cu kasablarından Kıroğlu Mustafa Beşe b. Yusuf muvâcehesinde merkūm Mustafa Beşe zimmetinde bundan akdem malımdan ve yedimden beher re’si on bir guruş bir rub‘a olmak üzere iştirâ ve kabz ve istihlâk eylediği altmış beş re’s ganem semeninden cem‘an yedi yüz otuz bir guruş on para alacak hakkım olmağla hâlâ taleb ederim deyü da‘vâ etdikde ol dahi cevâbında zikr olunan altmış beş re’s ganemin ancak otuz üç re’sini minvâl-i meşrûh üzere beher re’si on birer guruş onar paraya ve mâ‘adâ otuz iki re’s ganemin beher re’sini dokuzar guruşa iştirâ ve kabz ve istihlâk etmemle ol-vechile semenleri olan cem‘an altı yüz elli dokuz guruş on para zimmetimde müdde‘î-i mersûma deynimdir deyip müdde‘î-i mersûmun ziyâde müdde‘âsını inkâr etmekle müdde‘î-i mesfûr ber-minvâl-i muharrer ziyâde müdde‘âsına ikāmet-i beyyineden izhâr-ı acz ve tahlîfe dahi tâlib olmamağla ziyâde müdde‘âsıyla bilâ-beyyine mu‘ârazadan ba‘de’l-men‘ sâlifü’l-beyân ikrâr ü i‘tirâfıyla lâzım gelen meblağ-ı mecmû‘-ı merkūm altı yüz elli dokuz guruş on parayı müdde‘î-i mersûma edâsıyla merkūm Mustafa Beşe ilzâm olunduğu İstanbul Mahkemesi’nden huzûr. Fî 2 Receb sene [1]223.