İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 464 Hüküm no: 449 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürettikleri ürünleri Yahudi küfecilere satmaktan vazgeçerek bizzat kendileri satmaya başlayan çömlekçi esnafı aleyhine Yahudi küfecilerin açtığı davada bir orta yol bulunarak anlaşma sağlandığı Yahûd küfeci tâifesi Ma‘rûz Ashâb-ı arzuhâl küfeci tâifesinden Hayim ve İlyazer ve İsrail ve Salamon ve sâir mazbûtü’l-esâmî Yahûdîler meclis-i şer‘-i hatîrde İstanbul’da Zindan Kapısı dâhilinde çömlekçi esnâfının kethudâsı es-Seyyid Hüseyin ve yiğitbaşı Derviş Yakub ve es-Seyyid Osman ve Mehmed Sadık nâm kimesneler ile re‘âyâdan Sahak ve Karabet zimmîler muvâcehelerinde kadîmü’l-eyyâmdan beri Boğazhisârı’ndan esnâf-ı merkūmeye vürûd eden envâ‘-ı kâse ve tabak ve çanak ve gerek Bursa’dan vürûd eden toprak tencere ve tâbeleri mâ-tekaddemden beri esnâf-ı merkūme ustaları fiyât-ı mu‘tedile ile bizlere bey‘ bizler dahi esvâk ve bâzârda fukarâ-yı ibâdullâha füruht eder iken bu evânda fiyât-ı kadîmesinden gabn-i fâhiş ziyâde mutâlebesiyle rencîdeden hâlî olmayıp bizlere bey‘den imtinâ‘ etmeleriyle suâl olunup kadîmî üzere fiyât-ı mu‘tedile ile bizlere verip bilâ-mûcib ızrâr kasdıyla mümâna‘atları men‘ ü def‘ olunmak matlûbumuzdur deyü iştikâ onlar dahi navl-ı sefîne ve gümrük ve hammaliye masrûfları ve külliyetlü şikest zuhûrundan bahisle tazallüm-i hâl etmeleriyle husûs-ı merkūmun keyfiyeti erbâb-ı vukūfdan tahkīk olundukda herbirinin re’s-i mâlleri üzerine cüz’iyyât makūlesi fâide zammıyla bi’t-terâzî fukarâ-yı ibâda nef‘i mûcib olacak vechile fiyât-ı mu‘tedile vaz‘ıyla beynleri tevfîk ve ıslâh olunarak sâlifü’z-zikr Boğazhisâr’ın kebîr kâsesi on üç paraya ve vasat kâse dokuz paraya ve sagīr kâse altı paraya ve ikilik ta‘bîr olunur tabağın bin tânesi yüz on beş guruşa ve birlik ta‘bîr olunan tabağın kezâlik bin tânesi elli yedi guruşa ve ikisi birlik ta‘bîr olunan tabağın bin tânesi kırk guruşa ve kebîr soğuldan ta‘bîr olunur tabağın bin tânesi doksan üç guruşa ve sagīr soğuldan ta‘bîr olunan tabağın kezâlik bin tânesi kırk altı buçuk guruşa ve mârrü’l-beyân Bursakârı toprak tencerenin sagīr ve kebîr beher çifti kırk dört paraya ve kebîr tâbe on iki paraya ve vasat tâbe dokuz paraya ve sagīr tâbeyi altı paraya esnâf-ı merkūme dükkânlarından sağ ve sâlim olarak Yahûd küfeci tâifesine bey‘ ve füruht [65a] birle ziyâde nesne mütâlebesiyle rencîde etmeyip bu bahâne ile kıllet üzere getirdilip kesret ve vefret üzere celble cümlesi bi’l-ittifâk müte‘ahhid ve vech-i meşrûh üzere hareket edeceklerine kethudâları merkūm kefîl olup ve Yahûd küfeci tâifesi mesfûrûn dahi minvâl-i muharrer üzere iştirâ eyledikleri envâ‘-ı tabak ve tencere ve tâbenin fiyât-ı mevzû‘ası üzerine cüz’î fâide zammıyla esvâk ve bâzârda ibâdullâha fürûhta ta‘ahhüd ve kat‘-ı nizâ‘ eyledikleri İstanbul Mahkemesi’nden huzûr. Fî 29 C sene [1]223.