İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 465 Hüküm no: 450 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahipleri vefat edip borçlarından dolayı kayyıma devrolunan Küçükmustafapaşa’daki bir fırın gediğinin yirmi sekiz bargir itibarıyla dokuzar bargir hissesinin Karabet v. Aslan ile Bogos v. Serkiz’e satıldığı ve diğer on bargir hissesinin Sahak zimmîde bulunduğu Küçükmustafapaşa’da fırın Ma‘rûz Âsitâne-i aliyye ve tevâbi‘i olan Bilâd-ı selâse’de vâki‘ habbâzân esnâfının kethudâsı Mustafa Ağa ve bi’l-cümle nizâm ustaları meclis-i şer‘-i münîrde herbiri takrîr-i kelâm edip hâmiş-i arzuhâlde mastûr derkenâr nâtık olduğu üzere Başmuhâsebe’de mukayyed habbâzân ve uncuyân tâifesinden ba‘zılarına iflâs târî olmağla firâr ü gaybet birle fırın ve değirmenleri hâlî ve mu‘attal kaldığından lede’l-müzâyede semen-i misliyle âhara bey‘ ve semeniyle cânib-i mîrîye ve kapan tüccârına olan düyûnu edâ olunmak bâ-fermân-ı âlî şurût-ı nizâm-ı mer‘iyelerinden olduğuna binâen İstanbul’da Cebeali Kapısı kurbünde Küçükmustafapaşa’da kâin bir bâb etmekci fırını ve içinde âna merbût yedi horoslu bir bâb değirmen derûnlarında mevcûde beyne’l-esnâf gedik ta‘bîr olunan yirmi re’s bârgir i‘tibârıyla âlât-ı lâzıme-i ma‘lûmeden on dört re’s bârgir hissesine mâlikler olan Manas v. Arakil ve Samayil v. Mardıros ve on dört re’s bârgir hissesine mâlik olan Sahak v. Mifak nâm zimmîlerin hınta bahâsından cânib-i mîrîye işbu derkenâr mantûkunca dokuz bin yedi yüz kırk sekiz buçuk guruş ve ma‘lûmü’l-esâmî kapan tüccârına dört bin iki yüz elli bir buçuk guruş ki cem‘an on dört bin guruş deynleri olduğu hâlde derûn-ı arzuhâlde mezkûrü’l-ism mersûmân Manas ve Samayil zimmîlerden herbiri müflisen hâlik olmalarıyla ber-mûceb-i şurût-ı nizâm hisse-i mezkûrelerinin bey‘i muktezî olduğundan cânib-i mîrîye ve gerek kapan tüccârına olan düyûn-ı mezkûreyi müeccelen edâ etmek üzere şirâya tâlibler olan habbâzân tâifesinden bâ‘iseyü’l-i‘lâm Karabet v. Aslan ve Bogos v. Serkiz nâm zimmîler ber-vech-i âtî gedik-i mezkûr semenlerinden ceste ceste îfâ-yı deyn eylemeleri cânib-i mîrîye enfa‘ ve ibâdullâha hayırlu ve esnâfa eshel ve bu nizâm düstûrü’l-amel tutuldukça sâir mu‘attal olan fırın ve değirmenlerin küşâdına bâdî olur hâlâtdandır deyü ihbâr etmeleriyle âlât-ı mezkûreyi ber-vech-i muharrer bey‘e kıbel-i şer‘den vasî ve kayyım nasb olunan habbâzân kethudâsı mezbûr Mustafa Ağa b. Abdullah vesâyeten ve arzuhâl eden mersûm Sahak zimmî asâleten meclis-i şer‘-i münîrde kendi nefsinden asîl ve mersûm Bogos zimmî tarafından ber-vech-i âtî vekîl-i şer‘îsi mersûm Karabet zimmî muvâcehesinde herbiri bi’l-asâle ve bi’l-vesâye takrîr-i kelâm edip hâlikân-ı mersûmânın fırın ve değirmen-i mezkûrda gedik ta‘bîr olunur yirmi sekiz bârgir i‘tibâr olunan âlât-ı lâzıme-i ma‘lûmede mâlikler oldukları on dört re’s bârgir hisselerini yedi bin guruşa bi’l-vesâye mersûmân Bogos ve Karabet zimmîlere ve mersûm Sahak zimmî dahi mâlik olduğu on dört re’s bârgir hissesinin on re’s bârgir hissesini yedinde ibkā ve mâ‘adâ dört re’s bârgir hisse-i şâyi‘asını kezâlik zimmîyân-ı mersûmâna ale’l-iştirâki’s-seviyy iki bin guruşa deyn-i mezkûru edâ için el-yevm semen-i misillerinden ezyed olduğu ihbâr olunan cem‘an dokuz bin guruşa mesfûrâna vech-i meşrûh üzere bi’l-asâle ve bi’l-vesâye bey‘ ü temlik ve vech-i lâyıkı üzere teslîm onlar dahi ber-minvâl-i muharrer iştirâ ve temellük ve tesellüm ve kabz ü kabûl eylediklerinden sonra semenleri olan meblağ-ı mezbûr dokuz bin guruşu beher sene beşer yüz guruş cânib-i mîrîye müeccelen ve mukāssatan ve sâir ashâb-ı düyûna dahi ceste ceste edâya ta‘ahhüd etmeleriyle fırın ve değirmen-i mezkûrun gedik ta‘bîr olunan yirmi sekiz bârgir i‘tibârıyla dokuzar re’s bârgir hisse-i şâyi‘ası mersûmân Bogos ve Karabet zimmîlerden herbirinin uhdesine ve sâlifü’z-zikr yedinde ibkā eylediği on re’s bârgir hissesi dahi mesfûr Sahak zimmî meblağ-ı bâkī-i merkūm yedi yüz kırk sekiz buçuk guruşu cânib-i mîrîye edâ etmek üzere uhdesine Navul Kalemi’ne kayd ve yedine sûret i‘tâsı bâbında cümlesi istid‘â-yı inâyet eyledikleri İstanbul Mahkemesi’nden huzûr. Fî 4 Receb sene [1]223.