İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 467 Hüküm no: 451 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melak v. Asvador’un menzil hissesini kendisine vermedikleri iddiasıyla babası ile Etmekçi Atnaş aleyhine açtığı davada dört yüz elli kuruşa sulh olduğu Vakıf menzil da‘vâsından 450 guruşa sulh Ma‘rûz Sâhibe-i arzuhâl şahsı mu‘arrefe Melak nâm Nasrâniye meclis-i şer‘-i hatîrde zikri âtî menzile bi’l-icâreteyn mutasarrıf olup vâzı‘ü’l-yed olan derûn-ı arzuhâlde mersûmü’l-ism Etmekci Atnaş v. Marko nâm zimmî muvâcehesinde mersûme Melak Nasrâniyenin babası Kuyumcu Asvador v. Kirkor ve oğulları Kirkor ve Serkiz zimmîler hâzır oldukları hâlde hâmiş-i arzuhâlde mastûr defter-i vakıfdan muhrec derkenâr nâtık olduğu üzere Kuds-i şerîf’de vâki‘ Mar Yakub Kilisesi fukarâsı levâzımı evkāfı müstegallâtından olup İstanbul’da Balat Kapısı dâhilinde el-Hâc İsa mahallesinde kâin ma‘lûmü’l-hudûd bir bâb menzil hâl-i sıgārımda hâlike olan anamız Aranohi bt. Minas Nasrâniyenin ile’l-helâk bi’l-icâreteyn taht-ı tasarrufunda olup ba‘de helâkihî menzil-i merkūm sadrî kebîr oğulları hâzırân-ı mersûmân Kirkor ve Serkiz zimmîler ile bana ve sagīr oğlu İstefan ve sagīre kızı Filori nâm beş nefer evlâdlarına âdiyen ba‘de’l-intikāl babam hâzır-ı mesfûr Asvador zimmî benimle karındaşlarım sagīrân-ı mersûmânın velîleri ve bâ-hüccet vasîlerimiz olmak takrîbiyle menzil-i mezkûrda üç hums hisse-i şâyi‘amızı bedel-i misliyle âhara ferâğa kıbel-i şer‘den bâ-hüccet mezûn olduğuna binâen Minasfan v. Agop zimmîye bi’l-vesâye bâ-re’y-i mütevellî ferâğ ve kasr-ı yed ol dahi ba‘de’t-tefevvüz yine bâ-re’y-i mütevellî babam mesfûra ferâğ ve kasr-ı yed edip ve karındaşlarım hâzırân-ı mesfûrân Kirkor ve Serkiz zimmîler dahi hisselerini hüsn-i rızâlarıyla babamız mesfûr Asvador zimmîye bâ-re’y-i mütevellî ferâğ ve kasr-ı yed eylediklerinden sonra babamız mesfûr dahi menzil-i merkūmun mecmû‘unu işbu mersûm Atnaş zimmîye bedel-i misli olan beş bin beş yüz guruş bedel-i makbûza ferâğ-ı kat‘î-i mu‘teber ile bâ-re’y-i mütevellî ferâğ ve kasr-ı yed edip ve ben ba‘de’l-bulûğ babam hâzır-ı mesfûrun makbûzu olan bedel-i merkūmdan benim hums hisseme isâbet [65b] eden bin yüz guruşu babam mersûm bana vermediğine binâen ben dahi ferâğ-ı mezkûrunu mücîze olmamla menzil-i mezkûrun hums hisse-i şâyi‘asında bâ-re’y-i mütevellî keff-i yedine mersûm Atnaş zimmîye tenbîh olunmak matlûbumdur deyü vakf-ı merkūm mütevellîsi Arakil zimmî hâzır olduğu hâlde da‘vâ eylediğimde babam hâzır-ı mesfûr Asvador ile mersûm Atnaş zimmîler bedel-i merkūmdan hisse-i merkūme ki ba‘de’l-bulûğ sana vermişdik deyip ol-vechile beynimizde ba‘de vukū‘i’l-münâza‘a bâ-vesâtet-ı muslihîn beynimiz ıslâh olunup babam mesfûr ile mersûm Atnaş zimmîler rızâlarıyla mâllarından bana dört yüz elli guruş teberru‘an def‘ ü teslîm ben dahi kabz ve istihlâk birle ferâğ-ı mezkûru mücîze olmamla bi’l-cümle menzil-i mezkûra müte‘allika âmme-i da‘vâdan ben ve gerek karındaşlarım hâzırân-ı mersûmân Kirkor ve Serkiz zimmîlerden herbirimiz mesfûrân Asvador ve Atnaş zimmîlerin zimmetlerini onlar dahi bana medfû‘ları olan meblağ-ı müstehlek-i merkūmun istirdâdına müte‘allika da‘vâdan benim zimmetimi herbirimiz ibrâ-i âmm-ı sahîh-i şer‘î ile ibrâ ve iskāt ve herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri İstanbul Mahkemesi’nden huzûr. Fî 2 Receb sene [1]223.