İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 468 Hüküm no: 452 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferhan adlı Çerkes kadının kendisini köle olduğu iddiasıyla tutan Esirci Ömer aleyhine açtığı davada hür olduğunu ispat ettiği Hürriyet da‘vâsı Ma‘rûz Rıkka inkıyâd-ı sâbıkını mukırre ve mu‘terife olmağla ber-vech-i âtî da‘vâya kıbel-i şer‘den me’zûne olan orta boylu açık kaşlı mâi gözlü tahmînen on altı yaşında Seferhan nâm Müslimetü’l-mille bikr-i bâliğa meclis-i şer‘-i münîrde rık olmak üzere kendiye vâzı‘ü’l-yed olan Esirci es-Seyyid el-Hâc Ömer b. es-Seyyid Mustafa nâm kimesne muvâcehesinde ben vilâyet-i Anadolu’da Anapa Sancağı’nda Labe karyesinde sâkin Kuban Tatarlarından hürrü’l-asl Devlet Giray b. Hamza nâm mîrzânın firâşından hâsıla ve zevcesi hürretü’l-asl Hani bt. Muhammed Giray nâm hatundan mütevellide hürretü’l-asl olup bana ve ebeveynim mezbûrâna kat‘a rık târî olmuş değil iken merkūm es-Seyyid el-Hâc Ömer rık olmak üzere bi-gayrı hakkın bana vaz‘-ı yed etmekle sebîlim tahliye olunmak matlûbumdur deyü da‘vâ etdiğimde ol dahi cevâbında müdde‘iye-i mevsûfe-i merkūmeyi Çerkes cinsinden rık olmak üzere işbu hâzır bi’l-meclis Gedüsî Bezci İmâmoğlu el-Hâc İbrahim b. Halil nâm kimesneden bin beş yüz guruş semen-i medfû‘ ve makbûza iştirâ ve kabz etmemle ol-vechile şirâ-i câriye-i memlûkem olmağla vaz‘-ı yed ederim deyip hürriyet-i asliyesi ma‘lûmum değildir deyü hâzır-ı merkūmun tasdîkiyle inkâr etmekle müdde‘iye-i mezbûre ber-vech-i muharrer hürriyet-i asliye müdde‘âsını mahâllinde lede’t-tezkiye adl ve makbûlü’ş-şehâde idükleri ihbâr olunan Kubanlı Tatar Ali b. Osman ve Anapalı İsmail b. Muhammed nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince müdde‘iye-i mezbûrenin hürriyet-i asliyesine hükm ve sebîli tahliye olunduğu İstanbul Mahkemesi’nden huzûr. Fî 7 Receb sene [12]23.