İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 469 Hüküm no: 453 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niş sahrâsında alaybeyi bayrağı altında hazır bulunmadığı için Tırhala Sancağı’ndaki zeameti elinden alınan Mehmed Râşid’in hastalığından dolayı görev yerinde bulunamadığının anlaşıldığı Ze‘âmet Ma‘rûz Sâdır olan fermân-ı âlîlerine imtisâlen sâhib-i arzuhâl es-Seyyid Mehmed Râşid meclis-i şer‘-i münîrde hâmiş-i arzuhâlde mastûr derkenâr nâtık olduğu üzere Tırhala Sancağı’nda Mizistre Nâhiyesi’nde Haraso nâm-ı diğer Ağayani nâm karye ve gayrıdan yedi bin, ber-vech-i tekmîl yirmi bin akçe ze‘âmete babam Halil fevtinden müddet-i vâfire bâ-berât-ı âlî-şân cebelü bedeliyesiyle mutasarrıf olup cebelü kaydı küşâdıyla sene-i sâbıkāda Niş sahrâsında alaybeyi bayrağı altında mevcûd bulunmak üzere memûr kılınıp lâkin ben Âsitâne-i aliyye sâkinlerinden olup sene-i sâbıkāda hasta ve sâhib-i firâş olduğum ecilden yoklamada bi-özrin nâ-mevcûd olduğuma mebnî ref‘imden mülâzımlardan Hüseyin v. Yusuf’a tevcîh ve berât olunmuş olup ol-vechile ben nân-paramdan dûr ve mağdûr olmamla keyfiyet-i hâlim vukūfu olanlardan suâl ve tahkīk birle i‘lâm olunmasını istid‘â ve fi’l-hakīka sâhib-i arzuhâl merkūm Âsitâne sâkinlerinden olup birkaç seneden beri hasta ve sâhib-i firâş olduğunu vukūf-ı tamları olan sâbıkā Hakkı Mehmed Paşa kethudâsı silahşorân-ı hâssadan el-Hâc Yusuf Ağa ve Mehmed Ağa b. Mahmud ve İsmail Ağa b. Abdullah ve es-Seyyid Ahmed b. el-Hâc Mustafa ve Yusuf b. Ali nâm kimesneler bi’l-ittifâk haber verdikleri İstanbul Mahkemesi’nden huzûr. Fî 7 Recebi’l-ferd sene 1223.