İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 469 Hüküm no: 454 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zindan Kapısı haricindeki tütüncü dükkânı gediğini Dimitri v. Mihal’den bin kuruşa satın alan Praşkova ve ortağı Yorgi’nin dükkân gediğini Çobançeşmesi yakınlarında bir dükkâna naklettikleri ve üzerlerine kaydolunmasını talep ettikleri Tütüncü gediği nakli Ma‘rûz Ma‘den Kalemi’nde mukayyed ve mu‘teber gediklerden olup İstanbul’da Zindan Kapısı hâricinde Çardak ta‘bîr olunur kolluk tahtında kâin bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mâliki olan Dimitri v. Mihal zimmî meclis-i şer‘-i hatîrde tütüncü esnâfından Praşkova v. Dimitraki ve şerîki Yorgi v. Praşkova zimmîler muvâcehelerinde ber-vech-i muharrer bâ-sûret mâlik olduğum gedik ta‘bîr olunan âlât-ı lâzıme-i mezkûreyi mersûmân Praşkova ve Yorgi zimmîlere ale’l-iştirâki’s-seviyy bin guruş semen-i makbûza tarafeynden bi’l-îcâb ve’l-kabûl bâtten sahîhan bey‘ ü temlik ve teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan tütüncü gediğinde benim aslâ ve kat‘a alâka ve medhalim kalmayıp mersûmân Praşkova ve Yorgi zimmîlerin ale’l-iştirâki’s-seviyy mülk-i müşterâları olmuşdur dedikde onlar dahi ba‘de’t-tasdîk müşteriyân-ı mersûmân Praşkova ve Yorgi zimmîler meclis-i şer‘-i münîrde takrîr-i kelâm edip gediğini iştirâ eylediğimiz dükkân-ı mezkûr âhar akāra tebdîl olunmağla gedik-i merkūmu kurb ve civârında âhar dükkâna nakl olunmak esnâfımızın bâ-fermân-ı âlî şurût-ı mer‘iyemizden olmağla gedik-i merkūmu kurb ve civârında Çobançeşmesi kurbünde tuzcu dükkânı ittisâlinde köşe başında kâin taht-ı icâremde olup kimesnenin gediği olmayan bir bâb dükkâna nakl ve ber-vech-i muharrer kalemine kayd olunmak murâdımdır dedikde fi’l-hakīka bu makūle mukayyed ve mu‘teber olan gedikler hasbe’l-iktizâ kurb ve civârına nakli esnâf-ı merkūmenin bâ-fermân şurût-ı nizâm-ı mer‘iyelerinden olduğu kethudâ ve yiğitbaşı ve sâirleri meclis-i şer‘de haber vermeleriyle zikr olunan kolluk tahtında kâin dükkânda Dimitri zimmî ismine mukayyed olan tütüncü gediği mârrü’z-zikr civârında taht-ı icâresinde olan dükkâna nakl ve mahâll-i evvelin kaydı terkīn birle mersûmun ber-vech-i meşrûh bey‘inden mersûmân Praşkova ve Yorgi zimmîlerin uhdesine kayd ve mahâll-i sânîde mu‘teber olmak üzere yedlerine sûret i‘tâsını istirhâm eyledikleri İstanbul Mahkemesi’nden huzûr. Fî 7 Receb sene [1]223.