İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 475 Hüküm no: 459 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtip Şerif Hacı Mustafa Efendi Cami ve Mektebi Vakfı’nın tevliyet hakkının kendisine ait olduğunu iddia eden Mehmed Arif Efendi’nin iddiasını ispat edemediği Tevliyet mâddesi Ma‘rûz Sâhib-i arzuhâl Mehmed Ârif Efendi b. Ahmed meclis-i şer‘-i münîrde defterdâr-ı şıkk-ı evvel sa‘âdetlü efendi hazretlerinin nezâretlerinde âsûde evkāfdan İstanbul’da Aksaray nezdinde vâki‘ merhûm Kâtib Şerîf el-Hâc Mustafa Efendi Câmi‘-i şerîfi [ve] Mekteb-i Latifi Vakfı’nın yevmî otuz akçe vazîfe ile tevliyetine bâ-berât-ı âlî-şân mutasarrıf olan derûn-ı arzuhâlde mezkûrü’l-ism İsmail Nuri Efendi b. ( ) mahzarında vâkıf-ı merhûm-ı mûmâ-ileyhin bir kıt‘a vakfiye-i ma‘mûlün-bihâsında tafsîl ü beyân olunduğu üzere vakfının tevliyetini evvelâ kendi nefsine ba‘dehû evlâd ve evlâd-ı evlâd-ı evlâdına ba‘dehû kabakulak yeğeni el-Hâc Süleyman Beyefendi’ye ve ba‘dehû evlâdı ve evlâdı ve evlâd-ı evlâdı ve evlâd-ı evlâd-ı evlâdının batnen ba‘de-batnin ekberine ba‘dehû eşref ve erşed mürtezikaya şart ve ta‘yîn etmiş olup bundan akdemce tevliyet-i mezkûreye şart-ı vâkıf üzere mûmâ-ileyh el-Hâc Süleyman Bey’in oğlu Mehmed Said Beyefendi mutasarrıf iken bilâ-veled fevt oldukda meşrûtün-lehüm olan evlâd bi’l-külliye münkarız olmağla vakf-ı mezbûrun kâtibi olan merkūm İsmail Nuri Efendi mürtezikanın eşref ve umûr-ı vakf-ı mezbûru idâreye muktedir cümlesinin erşedi idiği bi’l-ihbâr mütehakkık olup nevbet-i tasarruf-ı tevliyet ber-mûceb-i şurût-ı vâkıf kâtib-i mezbûr İsmail Nuri Efendi’ye intikāl ve vech-i meşrûh üzere tevcîh olunmuş olup lâkin ben mûmâ-ileyh el-Hâc Süleyman Beyefendi’nin li-ebeveyn [67a] ammi Mehmed’in oğlu Ahmed’in sulbî oğlu olup ol-vechile meşrûtün-leh olan mûmâ-ileyh el-Hâc Süleyman Beyefendi’nin usûbet-i nesebiyye cihetinden akreb-i akrabasından olduğuma binâen tevliyet-i merkūme mezbûr İsmail Nuri Efendi’nin ref‘inden bana tevcîh olunmak murâdımdır dedikde müdde‘î-i merkūmun takrîr-i meşrûhu üzere tevliyet-i merkūme mûmâ-ileyh el-Hâc Süleyman Beyefendi’nin ancak evlâd-ı evlâdına meşrûta ve ba‘de inkırâzi’l-evlâd eşref ve erşed mürtezikaya meşrût olup akrabasına meşrûta olmadığını mu‘terif iken tevliyet-i mezkûreyi şer‘an mutâlebeye kādir olmadığı kendiye tefhîm olunup tevliyet-i mezbûre kemâ-kân merkūm İsmail Nuri Efendi tasarrufunda ibkā olunup müdde‘î-i mezbûr Mehmed Ârif da‘vâ-yı mezkûresiyle bî-vech mu‘ârazadan men‘ olunduğu İstanbul Mahkemesi’nden huzûr. Fî 3 Receb sene [12]23.