İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 476 Hüküm no: 461 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bektaş Efendi Vakfı’na ait helvacı dükkânı gediğine ortak olan Helvacı Mehmed Usta ile Helvacı Ali Beşe’nin ortaklık hisseleri oranında helvacı gediğini nöbetleşe kullanmalarına karar verildiği Helvacı dükkânı muhâyâsı Ma‘rûz Sâhib-i arzuhâl helvacı esnâfından Mehmed Usta b. el-Hâc Mehmed nâm kimesne meclis-i şer‘-i münîrde esnâf-ı merkūmeden derûn-ı arzuhâlde mezkûrü’l-ism es-Seyyid Ali Beşe b. Hüseyin nâm kimesne muvâcehesinde Âsitâne-i aliyye ve Bilâd-ı selâse’de vâki‘ helvacı esnâfının kethudâsı Mehmed Usta ve mütevellîsi İsmail Usta ve ihtiyârlarından Kapan-ı dakīkli Hüseyin Usta ve Mercanlı Memiş Usta ve Dikilitaşlı Ali Usta ve Nişâncılı Hüseyin Usta ve Balatlı Abdullah Usta ve Karamanlı es-Seyyid Ali Usta ve Odunkapılı Alemdâr Ahmed Usta ve Kasımpaşalı Mehmed Usta ve Mustafa Usta ve sâir bi’l-cümle helvacı esnâfı hâzır oldukları hâlde mahrûse-i Galata’da Kemankeş Karamustafapaşa mahallesinde Kareki Hamamı karşısında kâin ashâb-ı hayrâtdan İmâm-ı Sultanî merhûm Bektaş Efendi Vakfı musakkafâtından beher şehr otuz beş akçe icâre-i müeccelelü ma‘lûmü’l-hudûd bir bâb helvacı dükkânının sülüsü benim ve sülüsânı mezbûr es-Seyyid Ali Beşe’nin bi’l-icâreteyn bâ-temessük-i mütevellî iştirâken ve şâyi‘an taht-ı tasarrufumuzda ve derûnunda mevcûde hâmiş-i arzuhâlde mastûr derkenâr nâtık olduğu üzere Başmuhâsebe’de mukayyed ve mu‘teber gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış üç sehmi bâ-hüccet-i şer‘iye şirâen benim ve elli yedi sehmi merkūm es-Seyyid Ali Beşe’nin kezâlik yedimizde iştirâken ve şâyi‘an mülk ve hakkımız olup lâkin dükkân-ı mezkûrda merkūm es-Seyyid Ali Beşe müstakıllen sâkin ve derûnunda mevcûde gedik âlât-ı lâzıme-i ma‘lûmesini zabt ü tasarruf etmekle ba‘de’l-yevm dükkân-ı mezkûrun kirâ-yı kadîmi esnâf-ı hâzırûn-ı mezbûrûnun şurût-ı nizâmları üzere mâh be-mâh ba‘de’l-edâ ancak mu‘teber olan derûnunda mevcûde gedik âlât-ı lâzıme-i ma‘lûmeyi muhâyât tarîkıyla işbu târih-i i‘lâm şehri Recebi’l-ferd’i gurresinden evvelâ on bir ay on iki gün merkūm es-Seyyid Ali Beşe ve ba‘dehû bir sene on sekiz gün ben zabt ü tasarruf etmek üzere mezbûr es-Seyyid Ali Beşe’ye tenbîh olunmak matlûbumdur dedikde ol dahi husûs-ı mezkûru tasdîk ve vech-i meşrûh üzere muhâyât tarîkıyla zabt u tasarrufa râzı olup bu vechile kat‘-ı nizâ‘ eyledikleri İstanbul Mahkemesi’nden huzûr. Fî-gurreti Receb sene [12]23.