İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 478 Hüküm no: 463 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafının Tanaş v. Nikola hakkındaki şikâyetlerini nizamlarına aykırı hareket etmeyeceğine söz vermesi üzerine geri aldıkları Bakkāl esnâfına yine ke’l-evvel idhâl Ma‘rûz Âsitâne-i aliyye ve Bilâd-ı selâse’de vâki‘ bakkālân tâifesinin Bâzârbaşısı Süleyman Ağa ve Bölükbaşı es-Seyyid Ahmed ve ustalardan Mehmed Emin ve nizâm ustalarından Aci Yorgi ve Todori ve Yağmur ve Andriko ve Çakıroğlu Yorgi ve Ananosti ve Yorgaki ve Tarandafil ve sâirleri meclis-i şer‘-i münîrde İstanbul’da Tahte’l-kal‘a nâm mahâlde vâki‘ bakkāl tâifesinden Tanaş v. Nikola zimmî muvâcehesinde mersûm Tanaş zimmî esnâfımızdan olup lâkin kendi hâlinde ırzıyla mukayyed ve kâr [ü] kisbiyle meşgūl olmayıp dâimâ umûr-ı esnâfa müdâhale ve şurût-ı nizâmımızın mugāyiri harekât-ı nâ-marzıyeye ictisâr eylediğinden mâ‘adâ esnâfımızın ba‘zısına nefsâniyet icrâsıyla kendiye tâbi‘ eylediği aveneleriyle tezvîre sülûk birle bi-gayrı hakkın tecrîm ve tekdîrden hâlî olmayıp ve ol-vechile ihtilâl-i nizâmımızı mûcib hâlâta ibtidâr eylediğine binâen zimmî-i mersûmdan bir türlü emn ü rahatımız meslûb olmuşdur deyü muvâcehesinde teşekkî ve esnâf-ı merkūmeden hurûc birle kisb-i âhara sülûk eylemesini bâ-i‘lâm iltimâs ve istid‘â etmişidik el-hâletü hâzihî mesfûr Tanaş zimmî cünha-i sâbıkāsından mübâ‘adet birle fîmâ-ba‘d mugāyir-i nizâm-ı kadîm hareket etmeyip dükkânında kendi kâr ü kisbiyle meşgūl ve ırzıyla mukayyed olup bir vechile esnâf-ı merkūmeyi ızrâra tasaddî etmemek üzere huzûr-ı şer‘de ta‘ahhüd ve biz dahi tekeffül etmemizle eğer ba‘de’l-yevm hilâf-ı ta‘ahhüd hareketi zuhûr eder ise tedîbi icrâsına zimmî-i mersûm râzı oldukda esnâf-ı merkūmûn dahi zimmî-i mersûmun cünha-i sâbıkāsı icrâsını iltimâsdan fâriğler olup bu vechile kat‘-ı münâza‘a eyledikleri İstanbul Mahkemesi’nden huzûr. Fî-selhi Cumâdelâhire sene [1]223.