İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 479 Hüküm no: 464 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve havalisindeki francalacı fırınlarının sayısı padişahın iradesiyle on iki ile sınırlandırıldığı için Üsküdar’da Mirâhor mahallesinde Yorgi zimmînin açmak istediği francala fırını için de padişah iradesi gerektiği [Terkin edilmiş kayıt] İşbu i‘lâmın sebkinde sehv vâki‘ olmağla darb ve müceddeden tahrîr ve bundan sonra olan sicille kayd olunmuşdur. (mühür) Francalacı fırını < Sâdır olan fermân-ı âlîlerine imtisâlen işbu arzuhâl ve derkenârlara nazar olundukda bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā mâ‘adâsı bâ-irâde-i hazret-i şehin-şâhî bi’l-külliye sedd ü bend ve hilâfına ruhsat verilmeyeceği derkenârdan müstebân iken bundan mukaddemce vâlid-i mâcid-i hazret-i şehriyârî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve kethudâ-yı sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded francalacı fırınları ki cem‘an beş aded fırınlar sâire sirâyet etmemek ve bir vakitde emsâl olarak kaydı derkenâr olunmamak şartıyla beş aded fırınların küşâdıyla on iki adede iblâğı husûsuna irâde-i seniyye-i kātı‘a-i cihân-dârî ta‘alluk etmekle ancak zikr olunan beş aded francalacı fırınlarının küşâdı ruhsatını hâvî şeref-yâfte-i sudûr olan fermân-ı âlî-şân mûcebince on iki aded francalacı fırınlarından mâ‘adâ bir mahâlde fırın küşâd ve francala tabh ve i‘mâl ve bey‘ine ruhsat verilmeye deyü musarrah olmağla bu sûretde istid‘â olunan Üsküdar’da Ayazma kurbünde Mîr-âhûr mahallesinde Yorgi nâm zimmînin mutasarrıf olduğu francala fırınının küşâdı husûsu ancak irâde-i seniyye-i kātı‘a-i hazret-i cihân-dârîye mütevakkıf olur mevâddan olduğu İstanbul Mahkemesi’nden huzûr. Fî 15 B sene 1223>>