İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 480 Hüküm no: 466 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal Agoloylo’nun Nikokolaven’e olan on bir bin yedi yüz otuz dokuz kuruş borcunu taksitle ödemeye söz verdiği Bâ-sah İstanbul kādısı izzetlü fazîletlü efendi hazretleri Mersûmun deyni olan meblağı edâda ta‘annüd ve muhâlefeti zâhir olduğuna binâen mâlik olduğu emvâl ve eşyâsından tediye etdirilmesi lâzımeden olmağla mersûm Mihal’in bi’l-cümle emvâl ve eşyâsı ma‘rifet-i şer‘le ve esnâfı ma‘rifetleriyle tahrîr ve defter olunup işbu i‘lâmda muharrer deyni olan meblağ mukābelesinde ya aynen veyâhûd semenen tamamen i‘tâ ve ashâb-ı düyûnu iskāt ile keyfiyeti huzûrumuza i‘lâm eyleyesiz deyü buyuruldu. Fî 4 B sene [12]23. 11.739 guruş tecîl Ma‘rûz Sâdır olan fermân-ı âlîlerine imtisâlen Nemçe müstemenlerinden Nikokolaven v. Pandezi nâm müstemen meclis-i şer‘-i hatîrde tercümânı İklili hâzır olduğu hâlde İstanbul’da Vezir Hanı’nda mütemekkin Sâ‘atci Yoseboğlu Agop v. Partemyos nâm zimmî muvâcehesinde Bağçekapısı nâm mahâlde tuhafcı esnâfından Mihal Agoloylo v. Yorgi zimmî kezâlik hâzır olduğu hâlde işbu i‘lâm-ı evvel derûnunda tafsîl ü beyân olunduğu üzere hâzır-ı mersûm tuhafcı Mihal zimmetinde cihet-i deyn-i şer‘îden on bir bin yedi yüz otuz dokuz guruş mahkûmun-bih alacak hakkım olup deyn-i meblağ-ı mezbûra medyûnum hâzır-ı mesfûrun bi-şarti’r-rücû‘ emriyle mersûm Sâ‘atci Agop zimmî kefâlet-i mutlaka-i sahîha ile kefîl ve zâmin olmağla ben dahi kefâletini ba‘de’l-kabûl meblağ-ı mekfûlün-bih-i merkūmun beş bin guruşunu işbu târih-i hâmişden on bir gün mürûrunda ve mâ‘adâ altı bin yedi yüz otuz dokuz guruşunu altmış bir gün tamamında bana iki taksît ile tamamen ve kâmilen edâ ve îfâ etmek üzere benden istimhâl etmekle ben dahi medyûnum kefîl-i mersûmu rızâmla vech-i meşrûh üzere imhâl ve tecîl eyledim dediğini hâzır-ı mesfûr Mihal zimmî ile mesfûr Sâ‘atci Agop zimmîden herbiri tasdîk ve deyn-i meblağ-ı mahkûmun-bih-i mezbûra mersûm Sâ‘atci Agop zimmî kefâlet-i mutlaka-i sahîha ile kefîl ve zâmin olduğunu kat‘iyyen ve tâyi‘an ikrâr ü i‘tirâf edip meblağ-ı mekfûlün-bih-i merkūmu minvâl-i meşrûh üzere taksîtleri hulûlünde müstemen-i mersûma tamamen ve kâmilen bi-hükmi’l-kefâle edâ ve teslîme müte‘ahhid olduğu İstanbul Mahkemesi’nden huzûr. Fî 9 Receb sene [1]223.