İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 483 Hüküm no: 469 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzazistanî Ömer Ağa Dükkânı olarak bilinen tütüncü dükkânı gediğinin talebi üzerine mutasarrıfesi Zeliha’nın üzerine kaydının yapılması Tütüncü gediği mâddesi Ma‘rûz İstanbul’da Kocamustafapaşa Çarşısı’nda hamam karşısında Kolluk civârında berber dükkânı ittisâlinde kâin cizye kîsedârı tâbi‘i Bezzâzistânî Ömer Ağa dükkânı demekle arîf bir bâb tütüncü dükkânı derûnunda mevcûde beyne’l-hıref gedik ta‘bîr olunan âlât-ı lâzıme-i ma‘lûmesine mutasarrıfe olan sâhibe-i arzuhâl bâ‘isetü’l-i‘lâm mu‘arrefetü’z-zât Zeliha bt. Nuh nâm hatun meclis-i şer‘-i münîrde dükkân-ı mezkûrun bi’l-icâreteyn mutasarrıf merkūm Ömer Ağa ile tütüncü esnâfının kethudâsı İbrahim Ağa ve müsinn ü ihtiyâr ustalarından Şehremînli Mustafa Efendi ve Ali Ağa ve sâirleri hâzır oldukları hâlde takrîr-i kelâm ve ifâde-i merâm edip bundan akdem Âsitâne-i aliyye ve tevâbi‘i olan Bilâd-ı selâse’de vâki‘ tütüncü dükkânları muharrer ve gedikleri mu‘teber olmak üzere Ma‘den Kalemi’ne sebt ü kayd olunduğu esnâda benim mahâll-i mezkûrda kâin şehriye ikişer guruş kirâ ile taht-ı icâremde olan dükkân-ı merkūmun gediği tedâvül-i eyâdîyle yedimde mülküm olmağla dekâkin-i sâire gedikleri misillü ma‘an sebt ü kayd olunmak iktizâ eder iken sehven kayd olunmamağla vukūf-ı tammı olanlardan suâl ve tefahhus ve benim üzerime olmak üzere kalemine kayd olunmak murâdımdır deyip ve hâzır-ı merkūm Ömer Ağa ba‘de’t-tasdîk husûs-ı mezkûr kethudâ-yı merkūm ile esnâf-ı merkūme ihtiyârları hâzırûn-ı mezbûrûndan suâl olundukda zikr olunan Bezzâzistânî Ömer Ağa dükkânı demekle ma‘rûf olan dükkân gediği kadîm tütüncü dükkânı olup gediğinin el-yevm mâlike ve mutasarrıfesi Zeliha Hatun’dur deyü herbiri meclis-i şer‘de alâ-tarîki’ş-şehâde haber verdiklerinden mâ‘adâ mesbûk bi’l-emsâl olduğu derkenârdan müstefâd olmağla dükkân-ı mezkûrun gediği işbu mezbûre Zeliha Hatun üzerine olmak üzere kalemine kayd ve merkūme Zeliha Hatun yedine sûret i‘tâ olunmak bâbında istid‘â-yı inâyet eylediği İstanbul Mahkemesi’nden huzûr. Fî 16 Receb sene [12]23.