İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 484 Hüküm no: 470 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mircan v. Artin’in Uzunçarşı yakınlarındaki bir adet tuhafcı mahzeni gediğini Aci Kirkor’a bin beş yüz kuruşa sattığı Tuhafcı mahzeni gediği Ma‘rûz Başmuhâsebe’de mukayyed tuhafcı ve fincancı gediklerinden olup İstanbul’da Uzunçarşı kurbünde İbrahim Paşa Câmi‘-i şerîfi nezdinde Alâiyeli Hüseyin Ağa konağı tahtında çorabcıya muttasıl bir bâb tuhafcı ve fincancı mahzeni derûnunda mevcûde beyne’l-hıref tuhafcı gediği ta‘bîr olunan âlât-ı lâzıme-i ma‘lûmeye Başmuhâsebe’den verilen sûret mantûkunca mâlik olan Mircan v. Artin zimmî meclis-i şer‘-i hatîrde Aci Kirkor v. Bedgam zimmî muvâcehesinde takrîr-i kelâm edip bâlâda mezkûr bir bâb tuhafcı ve fincancı mahzeni derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin müstakıllen yedimde mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan mersûm Aci Kirkor zimmîye bin beş yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik-i mezkûr husûsuna müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyleyip fîmâ-ba‘d zikr olunan mahzen gediğinde benim kat‘a alâka ve medhalim kalmayıp mersûm Aci Kirkor zimmînin mülk-i müşterâsı olmuşdur dedikde ol dahi tasdîk etmeğin gedik-i mezkûrun kaydı kaleminde bâyi‘-i mersûm Mircan zimmînin üzerinden ref‘ ü ilgā ve müşterî-i mersûm Aci Kirkor zimmî üzerine kayd ü tahrîr ve yedine sûret i‘tâ olunmak bâbında istid‘â-yı inâyet eylediği İstanbul Mahkemesi’nden huzûr. Fî 10 Receb sene 1223.