İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 485 Hüküm no: 471 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdala v. Hazar’ın Boğçacı Agop’ta olan bin sekiz yüz on kuruş alacağını, alacağına kefil olmadıklarını ikrar ettiği alacaklısının oğullarından isteyemeyeceği 1.810 guruş men‘ Ma‘rûz Arzuhâl eden Musullu Abdala v. Hazar nâm zimmî meclis-i şer‘-i münîrde derûn-ı arzuhâlde isimleri mastûr Aci Dador ve karındaşları Markaryos ve Sinan evlâd-ı Agop nâm zimmîler muvâcehelerinde târih-i i‘lâmdan iki sene mukaddem mersûmûnun babaları Boğçacı Agop v. Azer nâm zimmî malımdan ve yedimden iştirâ ve kabz eylediği Musul bezleri ve Bağdâd ve Acem şalları semenlerinden cem‘an zimmetinde bâ-temessük bin sekiz yüz on guruş alacak hakkım olup dokuz aydan beri firâr ve hâlâ Kayseriye’de mütemekkin olduğu bana ihbâr olunup ve meblağ-ı merkūma eğerçi oğulları mesfûrûn kefâletleri olmayıp mücerred medyûnum gāib-i mesfûrun oğulları olduğuna binâen meblağ-ı mezbûru mallarından bana zâmin olsunlar deyü takrîr-i meşrûhu üzere oğulları zimmîyyûn-ı mersûmûnun deyn-i mezkûra kefâletleri olmadığını mukırr u mu‘terif iken tasaddî eylediği da‘vâsı şer‘an mesmû‘a olmayıp zimmîyyân-ı mesfûrûna suâl dahi teveccüh etmemekle müdde‘î-i mesfûr da‘vâ-yı mezkûresiyle zimmîyyûn-ı mersûmûna bî-vech mu‘ârazadan men‘ olunduğu İstanbul Mahkemesi’nden huzûr. Fî 13 Receb sene [1]223.