İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 485 Hüküm no: 472 Orijinal metin no: [68b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin Tütüncü İbrahim Beşe aleyhine açtığı alacak davasında beş yüz kuruşa sulh olduğu 500 guruş hüküm Ma‘rûz Derûn-ı arzuhâlde mezkûrü’l-ism Halil Efendi b. Mustafa meclis-i şer‘-i münîrde sâhib-i arzuhâl Tütüncü İbrahim Beşe b. Ömer nâm kimesne muvâcehesinde târih-i i‘lâmdan iki sene mukaddem mezbûr İbrahim Beşe malımdan ve yedimden üç def‘ada iktirâz ve kabz eylediği cem‘an bin guruş ve malımdan ve yedimden iştirâ ve kabz eylediği iki hilâlî sâ‘at semeninden dahi üç yüz yetmiş iki guruş otuz para ki min-haysü’l-mecmû‘ bin üç yüz yetmiş iki guruş otuz paranın üç yüz yetmiş iki guruş otuz parasını ceste ceste bana edâ ve teslîm ben dahi ahz ü kabz etmemle mâ‘adâ zimmetinde olan bin guruşu merkūm İbrahim Beşe’den hâlâ taleb ederim deyü da‘vâ eylediğimde ol dahi cevâbında [69a] senden ancak bin guruş iktirâz ve kabz etmiş idim deyip ziyâde müdde‘âmı inkârından mâ‘adâ meblağ-ı mezbûr için ilzâm-ı ribh olunmadan ceste ceste murâbaha nâmıyla cem‘an bin yedi buçuk guruşumu bi-gayrı hakkın ahz etmekle asl-ı deyn-i mezkûruma takas ve mahsûb ederim deyü beni def‘a tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn ben ber-vech-i muharrer tasaddî eylediğim bin guruş mutâlebemden bi’t-tav‘ ve’r-rızâ mezbûr İbrahim Beşe ile beş yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya ol dahi benden iddi‘â eylediği murâbaha-i merkūme husûsuna müte‘allika âmme-i da‘vâdan herbirimiz âharın zimmetini kabûlü hâvî ibrâ ve iskāt eyledik dediğini merkūm İbrahim Beşe tasdîk ve ibrâdan istisnâ olunan meblağ-ı merkūm beş yüz guruş zimmetinde müdde‘î-i mezbûra sahîhan deyni olduğunu kat‘iyyen ve tâyi‘an ikrâr u i‘tirâf etmeğin alâ-mûcibi i‘tirâfihî meblağ-ı merkūm beş yüz guruşu müdde‘î-i merkūm Halil Efendi’ye bi’t-taleb edâsıyla mezbûr İbrahim Beşe ilzâm olunduğu İstanbul Mahkemesi’nden huzûr. Fî 15 B sene [12]23.