İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 486 Hüküm no: 473 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. İstefan ve kardeşi Maryem’in Balat’ta Mahkemealtı Değirmeni olarak bilinen değirmendeki gedik hisselerini Kerniç v. Artin’e sattıkları Etmekci ve uncu gediği Ma‘rûz Âsitâne-i aliyye ve tevâbi‘i olan Bilâd-ı selâse’de vâki‘ habbâzân esnâfının kethudâsı Mustafa Ağa ve bi’l-cümle nizâm ustaları meclis-i şer‘-i münîrde herbiri takrîr-i kelâm edip habbâzân ve uncuyân tâifesinden ba‘zılarına iflâs târî olmağla firâr ve gaybet birle fırın ve değirmenleri hâlî ve mu‘attal kaldığından lede’l-müzâyede semen-i misliyle âhara bey‘ ve semeniyle cânib-i mîrîye olan düyûnu edâ olunmak bâ-fermân-ı âlî şurût-ı nizâm-ı mer‘iyelerinden olduğuna binâen İstanbul’da Balat Kapısı dâhilinde Mahkemealtı Değirmeni demekle ma‘rûf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunan on iki re’s bârgir ve sâir âlât-ı lâzıme-i ma‘lûmeden dokuz re’s bârgir hissesi ma‘lûmü’l-mikdâr deyn mukābelesinde cânib-i mîrînin ve üç re’s bârgir hissesi Saltana ve kız karındaşı Maryem binteyn İstefan nâm Nasrâniyelerin yedlerinde mülkleri olmağla deyn-i merkūm için cânib-i mîrîden zabt olunan dokuz re’s bârgirin iki horos sekiz re’s bârgirini tâlibi zuhûrunda füruht olunmak üzere şimdilik ibkā ve mâ‘adâ bir re’s bârgir hissesinin şirâya tâlibi zuhûr etmekle cânib-i mîrîden bey‘e kıbel-i şer‘den vasî ve kayyım nasb olunan habbâzân kethudâsı mezbûr Mustafa Ağa ve şahısları mu‘arrefe mersûmetân Saltana ve Maryem Nasrâniyeler meclis-i şer‘-i münîrde bâ‘isü’l-i‘lâm Kerniç v. Artin zimmî muvâcehesinde herbiri bi’l-asâle ve bi’l-vesâye takrîr-i kelâm edip zikr olunan bir horos dört re’s bârgirin bir re’s bârgiri deyn-i mezkûru edâ için el-yevm semen-i mislinden ezyed olduğu ihbâr olunan iki yüz elli guruşa ben bi’l-vesâye ve mersûmetân Saltana ve Maryem Nasrâniyeler bi’l-iştirâk mâlikeler oldukları üç re’s bârgir hisse-i şâyi‘alarını yedi yüz elli guruşa tarafeynden bi’l-îcâb ve’l-kabûl bâtten ve sahîhan bi-safkatin vâhidetin mesfûr Kerniç zimmîye herbirimiz bi’l-asâle ve bi’l-vesâye bey‘ ü temlik ve vech-i lâyıkı üzere teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabûl ve semen-i merkūm cem‘an bin guruşu müşterî-i mersûm yedimden herbirimiz bi-kadri’l-hısas tamamen ahz ü kabz edip ba‘de’l-yevm zikr olunan bir horos dört re’s bârgir i‘tibâr olunan âlât-ı lâzıme-i ma‘lûme hissesi mersûm Kerniç zimmînin mülk-i müşterâ ve hakk-ı sırfı olup bizim kat‘a alâka ve medhalimiz kalmamışdır dediklerini zimmî-i mesfûr ba‘de’t-tasdîk mersûm Kerniç zimmî ber-vech-i muharrer iştirâ eylediği uncu taşı ta‘bîr olunan bir horos dört re’s bârgiri mahrûse-i Galata’da Sandıkcılar başında Karanlık Çarşı’da kâin yedinde mâlı olan dört horoslu bir bâb etmekci değirmeninde etmekci taşlarıyla mahlût olmayıp destgâhı müfrez ve müstakıl olmak şartıyla nakl olunmasını iltimâs etmekle esnâf-ı merkūme dahi bu vechile müfrez ve müstakıl ve etrâfı kaplama tahta ile mahfûz olup mahlût olmadığı sûretde uncu horos nakli şurût-ı nizâm-ı kadîmlerinden olduğunu haber vermeleriyle mârrü’z-zikr üç horoslu uncu değirmeninden mersûm Kerniç zimmînin ber-vech-i muharrer iştirâ eylediği bir horos dört re’s bârgir i‘tibâr olunan uncu gediği şurût-ı mezkûresine ri‘âyet olunmak üzere sâlifü’z-zikr Karanlık Çarşı’da mâlik olduğu dört horoslu bir bâb etmekci değirmenine nakl olunup ber-vech-i muharrer kalemine kayd birle mârrü’z-zikr Mahkemealtı nâm mahâlde olan uncu değirmeninden bir horos gedik kaydı kaleminden ref‘ ü terkīn ve zikr olunan Karanlık Çarşı’da etmekci değirmeninin dört horosu etmekci ve bir horosu uncu olmak üzere Navul Kalemi’ne kayd ü bendine sûret i‘tâ buyurulmak niyâzında oldukları İstanbul Mahkemesi’nden huzûr. Fî 11 Receb sene [12]23.