İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 490 Hüküm no: 478 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Çarşısı’nda bir adet iplikçi dükkânının mutasarrıfları Nefise ile İplikçi Molla Hasan tarafından aylık dörder kuruş ücret ile Osman b. Osman’a kiraya verildiği Dörder guruşa dükkân îcârı Ma‘rûz Sâdır olan fermân-ı âlîlerine imtisâlen kıbel-i şer‘-i enverden mürsel keşif nâibimiz Merhabâzâde Mahmud Efendi ve bi’l-ma‘iye rü’yete memûr Haremeyn-i şerîfeyn müfettişi müderrisîn-i kirâmdan Paşmakîzâde fazîletlü es-Seyyid Mehmed Zeki Efendi tarafından mürsel Kâtib es-Seyyid Hüseyin Efendi hâssa mi‘mârlarından Ali Rıza Bey ve Mehmed halîfeler ile İstanbul’da Mercan Çarşısı’nda Basdırmacı Hanı kurbünde Kumru Hanı demekle ma‘rûf han tahtında kâin Dârü’s-sa‘âdeti’ş-şerîfe ağası hazretlerinin nezâretinde âsûde evkāfdan zikri âtî bir bâb dükkânın arsası merhûme Kumru Hatun Vakfı’na mukāta‘a-i kadîmeli ve üzerinde mevcûde bi’l-cümle ebniyesinin nısf hisse-i şâyi‘asının vâkıfı ve mütevellîsi Şeyh Hasan Efendi b. Osman tarafından mürsel vekîli Mehmed Salih b. İsmail ve nısf-ı şâyi‘-i âharını vakf ve bi’l-meşrûta mütevellîsi olduğu Mukābele-i Süvârî hulefâsından merhûm İsmail Efendi Vakfı’nda ilhâk eden es-Seyyid İbrahim Efendi b. Mehmed Emin hâzır oldukları hâlde vakfeyn-i mezkûreyn müsakkafâtından işbu derûnunda akd-i meclis-i şer‘ olunan bir tarafdan vakf-ı mezbûrdan Mardıros zimmî tasarrufunda olan iplikçi dükkânı ve bir tarafdan Kumru Hatun Hanı ve bir tarafdan Pîrîpaşa Vakfı’ndan Kengirili Ali Ağa dükkânı ile mahdûd bir bâb iplikçi dükkânının mûmâ-ileyh İsmail Efendi Vakfı’ndan olan nısf hisse-i şâyi‘asına bi’l-icâreteyn mutasarrıfe olan Nefise bt. Ahmed nâm hatunun zevci ve tarafından husûs-ı âti’l-beyânda vekîl olduğu zâtını ârifân Osman Ağa b. Hüseyin ve Ömer Ağa b. Ebîbekir şehâdetleriyle sâbit olan Mehmed Said Ağa b. Hüseyin meclis-i ma‘kūd-ı mezkûrda dükkân-ı mezkûrun nısf-ı şâyi‘-i âharına müvekkil-i mûmâ-ileyh Şeyh Hasan Efendi’nin mütevellîsi olduğu vakfından olmak üzere kezâlik bi’l-icâreteyn mutasarrıf olan derûn-ı arzuhâlde mezkûrü’l-ism İplikçi Molla Hasan b. Osman mahzarında işbu derûnunda akd-i meclis olunan vakfeyn-i mezkûreynden olan bir bâb dükkân-ı mezkûr müvekkilem zevcem mezbûre ile mezbûr Molla Hasan’ın bi’l-icâreteyn ale’l-iştirâki’s-seviyy taht-ı tasarruflarında olup ve dükkân-ı mezkûr kābil-i kısmet olmağla herbirinin hisseleri mütevellîleri re’yiyle ifrâz esnâsında iken ben ve gerek mezbûr Molla Hasan’dan herbirimiz bi’t-tav‘ ve’r-rızâ dükkân-ı mezkûru aded-i şühûr beyân olunmaksızın beher şehr dörder guruş icâre tesmiyesiyle işbu hâzır bi’l-meclis iplikçi esnâfının yiğitbaşısı Osman b. Osman nâm kimesneye bi’l-asâle ve bi’l-vekâle îcâr ve teslîm eylediğimizde ol dahi ber-vech-i muharrer istîcâr ve kabûl ve şehriye kirâsı olan dörder guruşun nısfını müvekkilem mezbûreye ve nısf-ı âharını dahi merkūm Molla Hasan’a mâh be-mâh cevr ü ezâ etmeksizin edâya ta‘ahhüd eyledikde esnâf-ı mezbûre kethudâsı Mustafa Ağa b. Ali ve Çarşı Bekcibaşısı es-Seyyid Halil b. es-Seyyid Ali ve Tâcir es-Seyyid el-Hâc Hafız Mehmed Efendi b. el-Hâc Mustafa ve Mustafa Ağa b. Mehmed nâm kimesneler dahi meblağ-ı mezbûr dörder guruşa tarafeynden bi’l-emr ve’l-kabûl kefîl ve zâminler olup kat‘-ı münâza‘a eylediklerini kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 14 Receb sene 1223.