İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 499 Hüküm no: 486 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Hüseyin’in Molla Kestel mahallesindeki vakıf menzil hissesini boşandığı karısı Hadice’ye on beş gün içerisinde bedeli olan yedi yüz yetmiş beş kuruşu ödemesi kaydıyla devretmeye söz verdiği Menzil mâddesi Ma‘rûz Sâhib-i arzuhâl Berber Hüseyin b. Ali nâm kimesne meclis-i şer‘-i münîrde zevce-i mutallakası derûn-ı arzuhâlde mezkûretü’l-ism mu‘arrefetü’z-zât Hadice bt. Abdullah nâm hatun muvâcehesinde hâmiş-i arzuhâlde mastûr defter-i vakıfdan muhrec derkenâr nâtık olduğu üzere merhûm Kasab İlyas Câmi‘-i şerîfi Vakfı müsakkafâtından İstanbul’da Ağayokuşu kurbünde Molla Kestel mahallesinde vaki‘ beher şehr on beş akçe icâre-i müecceleli bir bâb vakıf menzilin rub‘ hissesi zevce-i mutallakam mezbûre Hadice Hatun’un ve mâ‘adâ selâse-i erba‘ı benim bi’l-icâreteyn taht-ı tasarrufumuzda olmağla hâlâ ben mutasarrıf olduğum selâse-i erbâ‘ hissemi yedi yüz yetmiş beş guruş bedel mukābelesinde hüsn-i rızâ ve tayyib-i hâtırım ve ferâğ-ı kat‘î-i mu‘teber ile bâ-re’y-i mütevellî mezbûre Hadice Hatun’a ferâğa müte‘ahhid olduğumda ol dahi bedel-i merkūmu târih-i i‘lâmdan on beş gün mürûruna değin tedârük ve bana teslîme müte‘ahhide olup menzil-i mezkûr ferâğı husûsundan mâ‘adâ ibtidâ-i zevciyetden işbu târih-i i‘lâma gelince bi’l-cümle beynimizde cereyân eden cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan herbirimiz âharın zimmetini ibrâ ve iskāt ve her birimiz âharın ibrâsını kabûlle külliyen kat‘-ı münâza‘a eyledik deyü ikrâr ve tasdîkleri İstanbul Mahkemesi’nde tescîl ve huzûr. Fî 11 Receb sene [1]223.