İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 499 Hüküm no: 487 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asitane’de resmî ve özel binalarda çalıştırılan marangoz, sıvacı, nakkaş, duvarcı ve diğer amelenin sicilde kaydolunan yevmiye nizamına uygun olarak günlük ücret talebinde bulunmaya söz verdikleri Neccâr ve sıvacı ve nakkāş ve duvarcı ve sâir amele yevmiyeleri Ma‘rûz Âsitâne-i aliyye’de mîrî ve gerek sâir ebniyede istihdâm olunan neccâr ve sıvacı ve nakkāş ve duvarcı ve sâir esnâf-ı amelenin yevmiyeleri nizâmı sicill-i mahfûzda ve aklâmda ve mi‘mârlara mahsûs mazbatada mukayyed olup ale’d-devam icrâsı lâzımeden iken bir müddetden beri amele-i mezkûrenin nizâmları üzere verilen yevmiyeye kāni‘ olmayarak günden güne artırıp ashâb-ı ebniyeden bây ü gedâ tahammül edemeyecek dereceye resîde olduğu ihbâr olunduğuna mebnî mukaddemce verilen yevmiye nizâmı vakt ü hâle nazaran icra [ecr-i] misillerine mu‘âdil olmağla düstûrü’l-amel tutularak tanzîmi bâbında bu dâ‘îlerine hitâben beyaz üzerine şeref-yâfte-i sudûr olan fermân-ı âlîlerine imtisâlen ser-mi‘mâr-ı hâssa ağa bendeleri ve Ser-halîfe Ali Rıza Bey ve Nakkāşbaşı Ahmed Ağa ve Lağımcıbaşı Hüseyin kulları hâzır oldukları hâlde neccâr kalfalarından Foti ve Komyanos ve Yorgi ve Todori ve Karabet ve Nikoli ve Kostantin ve Yani ve Küçük Yorgi ve Zafiri ve Pavli ve Maydoslu Komyanos ve yiğitbaşıları Anastas ve Yani ve Komyanos ve Tarandafil ve Sahak zimmîler ve Yahûd tâifesinden Aslan ve Bünyamin ve Duvarcı Yiğitbaşısı Yani ve Andriya ve ustalarından Kosti ve diğer Kosti ve Yorgi ve Sıvacıbaşı Kirkor ve ustalarından Marat ve Yorgi ve Delot ve Hamamcıbaşı Kirkor ve ustalarından Agop ve Abkar ve sâirleri meclis-i şer‘a ihzâr olunup emr-i celîlü’ş-şân muvâcehelerinde kırâet ve mazmûn-ı itâ‘at-makrûnu cümlesine tefhîm ve işâ‘at ve sicill-i mahfûzda mazbût verilen yevmiye nizâmı vakt ü hâle göre her bir sınıfın ecr-i misillerine mu‘âdil olduğu ser-mi‘mâr-ı hâssa ağa kulları ve sâir erbâb-ı vukūf ihbârlarıyla mütehakkık olarak cümlesine yegân yegân ifâde ve tenbîh olundukda cümlesi ser-zemîn-i merâsim-i itâ‘ati yerine getirip bizim mukaddemce verilen yevmiye nizâmının hilâfı hareket ile ziyâde nesne mütâlebemiz olmayıp ancak ba‘zı mechûlü’l-ahvâl neccâr makūleleri iki üç nefer neccâr tedârüküyle kalfalık zu‘munda olarak ebniye inşâsına mübâderet edenler ziyâde yevmiye mütâlebesiyle ashâb-ı ebniyeye rencîde eyledikleri inhâ olunmuş olup ancak fîmâ-ba‘d işbu müfredât defteri üzere verilen yevmiye nizâmı düstûrü’l-amel tutulup hilâfı hareket tecvîz olunmamak üzere cümlesi ta‘ahhüd ve vech-i meşrûh üzere hareket edeceklerine birbirlerine tekeffül ve cümlesine kalfalar mersûmûn tekeffül etmeleriyle eğer ba‘de zamânin içlerinden hilâfı harekete ictisâr ederi olur ise tedîbi icrâsına râzılar olup ber-vech-i muharrer ta‘ahhüd ve kefâletleri tescîl ve bir kıt‘a müfredât defteri takdîm-i hâk-i devletleri kılınmağla defter-i mezkûrun bâlâsına vech-i meşrûh üzere amel ve hareket ve hilâfından hazer ve mücânebet olunmak bâbında ser-mi‘mâr-ı hâssa ağa kullarına hitâben fermân-ı âlîleri sudûru muktezâ-yı maslahatdan idiği İstanbul Mahkemesi’nden huzûr-ı âlîlerini i‘lâm olundu el-emrü li-veliyyü’l-emr. Fî 17 Receb sene [1]223.