İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 500 Hüküm no: 488 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirmerd Çavuş Mescidi imamlığına berat ile mutasarrıf olan Musa Efendi’nin dört yüz kuruş karşılığında söz konusu mescidin imamlığını Hüseyin Halife’ye devrettiği İmâmet mâddesi Ma‘rûz Hâmiş-i arzuhâlde mastûr derkenâr mantûkunca nezâret-i hazret-i sadâret-penâhîde âsûde evkāfdan merhûm Zal Mahmud Paşa Evkāfı mülhakātından İstanbu[l’da] Molla Gürânî nezdinde Şirmerd Çavuş Mescidi’nde merhûm Sarı Kethudâ Mustafa Paşa Vakfı’ndan almak üzere yevmî on akçe vazîfe ile imâmet cihetine bâ-berât-ı âlî-şân mutasarrıf olan sâhib-i arzuhâl Musa Efendi b. Ahmed nâm kimesne evkāf müfettişi müderrisîn-i kirâm-ı zevi’l-ihtirâmdan fazîletlü es-Seyyid Mustafa Nuri Efendi ma‘iyetiyle akd olunan meclis-i şer‘-i münîrde nezâret-i dâ‘îlerinde olan evkāfdan merhûm-ı mezbûr Şirmerd Çavuş Mescid-i şerîfi Vakfı’ndan almak üzere vazîfe-i mu‘ayyene ile mescid-i mezbûrda imâmet cihetine mutasarrıf olan es-Seyyid Hüseyin Halîfe b. es-Seyyid Ali muvâcehesinde vâkıf-ı merhûm-ı mûmâ-ileyh Sarı Kethudâ Mustafa Paşa hayatında zikr olunan Şirmerd Çavuş Mescid-i şerîfine minber vaz‘ edip câmi‘-i şerîf etmekle mescid-i mezbûrda imâm bulunan kimesneye dahi tertîb eylediği vakfı mahsûlünden yevmî on akçe vazîfe ta‘yîn edip ol-vechile imâmeteyn-i mezbûreteyn mâ-tekaddemden beri şahs-ı vâhidde olduğu derkenârdan müstebân olup ve imâmeteyn-i mezbûreteyne amel-i kadîm üzere mutasarrıf olan Mehmed Tâhir Halîfe b. Hüseyin bundan akdemce bilâ-veled fevt oldukda mahlûlünden zikr olunan Şirmerd Çavuş Mescidi Vakfı’ndan olan vazîfe-i mu‘ayyene ile imâmeti işbu mezbûr es-Seyyid Hüseyin Halîfe’ye tevcîh ve merhûm-ı mûmâ-ileyh Sarı Kethudâ Mustafa Paşa Vakfı’ndan olan yevmî on akçe ile mescid-i şerîf-i mezbûrda imâmet ciheti dahi kezâlik müteveffâ-yı mezbûrun mahlûlünden bana tevcîh ve herbirimize başka başka berât-ı şerîf i‘tâ olunmuş olup lâkin imâmeteyn-i mezkûreteyn kadîmü’l-eyyâmdan beri şahs-ı vâhidde olup amel-i kadîm dahi minvâl-i meşrûh üzere cârî olageldiği ma‘lûmum olduğuna binâen ben dahi mutasarrıf olduğum imâmet-i mezkûre cihetimi hüsn-i rızâ ve tayyib-i hâtırım ve ferâğ-ı kat‘î-i mu‘teber ile dört yüz guruş bedel-i makbûz mukābelesinde merkūm es-Seyyid Hüseyin Halîfe’ye ferâğ ve kasr-ı yed ve tezkiresini kendüye teslîm ol dahi ba‘de’l-kabûl ben cihet-i mezkûreye ol dahi bana medfû‘u olup makbûzum olan bedel-i merkūmun istirdâdına ve bi’l-cümle husûs-ı mezkûra müte‘allika âmme-i da‘vâdan herbirimiz âharın zimmetini kabûlü hâvî ibrâ ve iskāt eyledik dediğini mezbûr es-Seyyid Hüseyin Halîfe tasdîk etmeğin imâmet-i mezkûre ciheti fâriğ-i merkūm Musa Efendi’nin kasr-ı ye[din]den merkūm es-Seyyid Hüseyin Halîfe’ye tevcîh ve yedine berât-ı şerîf-i âlî-şân sadaka ve ihsân buyurulmak bâbında istid‘â-yı inâyet eylediği İstanbul Mahkemesi’nden huzûr. Fî 21 Receb sene [12]23.