İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 502 Hüküm no: 489 Orijinal metin no: [71a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Mıgırdıç’ın Uncu Mehmed Ali’den yüz yetmiş beş kuruş alacağı olduğu 175 guruş hüküm ve ribâ men‘i Ma‘rûz İstanbul’da Kapan-ı dakīk kapısı dâhilinde mütemekkin sarrâf tâifesinden derûn-ı arzuhâlde merkūmü’l-ism Mıgırdıç v. Bedros nâm zimmî meclis-i şer‘-i hatîrde uncu esnâfından sâhib-i arzuhâl Mehmed Ali b. Abdullah muvâcehesinde mezbûr Mehmed Ali zimmetinde cihet-i karzdan bâ-temessük iki bin [71b] sekiz yüz otuz beş guruşdan bâkī yüz otuz beş guruş ve hâric ez-temessük yine cihet-i mezkûreden kırk guruş ki cem‘an yüz yetmiş beş guruş alacak hakkım olmağla hâlâ taleb ederim deyü da‘vâ etdi[ğimde] ol dahi cevâbında ber-vech-i muharrer cihet-i mezkûreden ol-mikdâr guruş deyni olmak üzere ikrârını ve temessük i‘tâsını bi-tamamihi tâyi‘an ve kat‘iyyen ikrâr ve i‘tirâf edip lâkin temessük-i mezkûrda tahrîr olunan meblağ-ı merkūm iki bin sekiz yüz otuz beş guruş müdde‘î-i mesfûra kat‘a benim deynim olmayıp altı buçuk seneden beri beynimizde cârî ahz ü i‘tâ için bilâ-ilzâm üzerime tahmîl olunan ribhin ribh-i mecmû‘u ribâdır ancak ben minvâl-i meşrûh deynim olmak üzere ikrâr ve temessük-i mezkûru i‘tâ eylediğimden sonra meblağ-ı merkūmun iki bin yedi yüz guruşunu kabzını mu‘terif olduğu üzere kendüye def‘ ü teslîm etmiş idim lâkin fi’l-hakīka meblağ-ı mezbûr deynim olmamağla makbûzu olan meblağ-ı merkūm iki bin yedi yüz guruşu defter-i mesfûrdan istirdâd murâdımdır deyü da‘vâya tasaddî etdikde müdde‘î sarrâf-ı mesfûr ber-vech-i meşrûh ribâ olduğunu inkâr edip ve mezbûr Mehmed Ali’nin takrîri üzere meblağ-ı mezbûrun küllîsi ribâdır deyü eylediği da‘vâsı şer‘an mesmu‘a olmayıp ikrârı mûcebince lâzım gelen meblağ-ı bâkī-i merkūm yüz yetmiş beş guruşunu müdde‘î sarrâf-ı mesfûra edâsıyla mezbûr Mehmed Ali ilzâm olunduğu İstanbul Mahkemesi’nden huzûr. Fî 16 Receb sene [12]23.