İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 502 Hüküm no: 490 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Hacı Süleyman’ın kendisinden haksız yere parasını ve malını aldığı iddiasıyla kethudaları Hasan Ağa aleyhine açtığı davada iddiasını ispat edemediği 100 guruş, bir Trablus kuşağı men‘i Ma‘rûz Sâhib-i arzuhâl Şerbetci el-Hâc Süleyman nâm kimesne meclis-i şer‘-i münîrde derûn-ı arzuhâlde mezkûrü’l-ism kebâbcı ve hoşâbcı ve şerbetçi esnâfının kethudâsı es-Seyyid el-Hâc Hasan Ağa muvâcehesinde İstanbul’da Gedikpaşa nâm mahâlde kâin mutasarrıf olduğum dükkânımı sâir şerbetçi dükkânları gediklerine ilhâk birle şerbetçi gediği tanzîmi’çün bundan akdem malımdan rüşvet tarîkıyla merkūm es-Seyyid el-Hâc Hasan ağa bi-gayrı hakkın yüz guruşumu ve altmış guruş kıymetli bir Trablus kuşağımı alıp dükkân-ı mezkûrumu şerbetçi dükkânları gediklerine ilhâk etdirmemekle meblağ-ı merkūm ile zikr olunan kuşağı mezbûr es-Seyyid el-Hâc Hasan Ağa’dan istirdâd murâdımdır deyü da‘vâ ol dahi külliyen inkâr etmekle müdde‘î-i mezbûr ber-vech-i muharrer müdde‘âsına ikāmet-i beyyine edemeyip talebiyle merkūm es-Seyyid el-Hâc Hasan Ağa tahlîf olunmağın mûcebince müdde‘î-i merkūm el-Hâc Süleyman da‘vâ-yı mezkûresiyle bilâ-beyyine mezbûr es-Seyyid el-Hâc Hasan Ağa’ya bî-vech mu‘ârazadan men‘ olunduğu İstanbul Mahkemesi’nden huzûr. Fî 20 Receb sene [12]23.