İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 503 Hüküm no: 491 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habbaz Usta Tanaş ile ortağı Lambo’nun Usta Artin’den satın aldıkları Mahkemealtı Değirmeni’ndeki uncu gediği hissesinin bedelini zamanında ödeyemedikleri için satışı iptal edilip uncu gediği hissesini sahibine iade ettikleri 2 horos uncu gediği Ma‘rûz Habbâzân tâifesinden Usta Tanaş v. Panayot ve şerîki Lambo v. Yani zimmîler meclis-i şer‘-i hatîrde yine tâife-i merkūmeden bâ‘isü’l-i‘lâm Usta Artin v. Noyrat zimmî muvâcehesinde herbiri takrîr-i kelâm edip mersûm Artin zimmî mahrûse-i Galata’da Arab Câmi‘-i şerîfi kurbünde Mahkemealtı Değirmeni demekle ma‘rûf üç horoslu bir bâb uncu değirmeni derûnunda mevcûde beyne’l-esnâf gedik ta‘bîr olunur on iki re’s bârgir ve sâir âlât-ı lâzıme-i ma‘lûmenin iki horos sekiz re’s bârgir hissesi mersûm Artin zimmînin ve bir horos dört re’s bârgir hissesi Turfanda bt. Maryem nâm Nasrâniyenin ale’l-iştirâki’s-seviyy yedlerinde mülk ve hakları iken mersûm Usta Artin zimmî zikr olunan iki horos sekiz re’s bârgir hisse-i şâyi‘asını birkaç gün mukaddem semeni bir sene tamamına değin müeccel olmak üzere üç bin guruşa bize ale’l-iştirâki’s-seviye bey‘ ve temlik ve teslîm bizler dahi ber-vech-i muharrer iştirâ ve temellük ve tesellüm ve kabûl edip ve esnâf-ı merkūmenin hasbe’l-iktizâ gedikleri olan horos nakli şurût-ı nizâm-ı kadîm-i mer‘iyelerinden olmağla mârrü’z-zikr iştirâ eylediğimiz iki horos sekiz re’s bârgir hisse-i şâyi‘amızı mahrûse-i mezbûreye muzâfe İstinye Nâhiyesi’ne tâbi Tarabya karyesinde müceddeden binâ edeceğimiz değirmene nakletmek üzere kalemine kayd için meclis-i şer‘de takrîr ve i‘lâm olunmak üzere iken biz semen-i merkūmu mersûm Artin zimmîye peşinen edâ edemediğimizden mâ‘adâ ba‘zı esbâba mebnî bey‘-i mezkûru beynimizde bi’t-terâzî fesh ve ikāle birle mebî‘-i mezkûru mersûm Usta Artin zimmîye redd ü teslîm eyledik ba‘de’l-yevm sâlifü’z-zikr uncu gediği ta‘bîr olunan sekiz re’s bârgir ve onlara isâbet eden sâir âlât-ı lâzıme-i ma‘lûme ke’l-evvel mersûm Usta Artin zimmînin mülk-i mahzı ve hakk-ı sırfı olup bizim gedik-i mezkûrda kat‘a alâka ve medhallerimiz olmayıp ve mersûm Usta Artin zimmî zimmetinde bir akçe ve bir habbe hakkımız ve alacağımız yokdur deyü mukırrân-ı zimmîyyân-ı mersûmânın takrîr-i meşrûhlarını mersûm Usta Artin zimmî tasdîk eylediği İstanbul Mahkemesi’nde tescîl ve huzûr. Fî 17 Receb sene [1]223.