İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 505 Hüküm no: 493 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatune bt. Sava’nın Çadırcı Mehmed mahallesinde mutasarrıf olduğu dükkânına bir adet kepenk koymasına izin verildiği Keşf Ma‘rûz Sâdır olan fermân-ı âlîlerine imtisâlen cânib-i şer‘-i enverden mürsel keşif nâibimiz Merhabâzâde Mahmud Efendi hâssa mi‘mârı hulefâsından es-Seyyid Mehmed ve Mehmed Hasib halîfeler İstanbul’da Gedikpaşa kurbünde Çadırcı Mehmed mahallesinde vâki‘ nezâret-i dâ‘îlerinde olan evkāfdan İskender Paşa Câmi‘-i şerîfinde imâm ve müezzin olanlara galle ve tevliyeti meşrûta Hafîze Hatun Vakfı’ndan mukaddemâ sandalcı ve hâlâ peştemâlci destgâhı odasına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde dükkân-ı mezkûrun bi’l-icâreteyn mutasarrıfesi sâhibe-i arzuhâl şahsı mu‘arrefe olan Hatune bt. Sava nâm Nasrâniye meclis-i ma‘kūd-ı mezkûrda derûn-ı arzuhâlde mezkûr Esirci Mehmed b. İsmail ve İbrahim b. Hasan muvâcehelerinde vakf-ı mezbûr mütevellîleri olup kendi nefsinden asîl ve şerîki Müezzin Hafız Mehmed b. Ahmed tarafından vekîl-i mürseli olan İmâm Hafız es-Seyyid Ahmed Efendi b. el-Hâc Mehmed hâzır olduğu hâlde işbu derûnunda akd-i meclis-i şer‘-i kavîm olunan peştemâlci odasının tarîk-i âm tarafında vâki‘ tûlen iki zirâ‘ altı parmak ve arzen iki zirâ‘ dükkân mahâllinin kadîmi üzere bir aded kepengini vaz‘ etmek murâd eylediğimde mezbûrân bi-gayrı hakkın mümâna‘at etmeleriyle vâki‘ olan te‘addîleri men‘ ü def‘ olunmak matlûbumdur deyü da‘vâ eyledikde mi‘mârân-ı mezbûrân ba‘de’l-keşf ve’l-mu‘âyene meclis-i şer‘a gelip işbu mezbûrân Mehmed ve İbrahim’in menzilleri tarîk-i âm aşurı dükkân-ı mezkûrun karşısında olup mahâll-i mezkûr kadîmden dükkân olmağla eser-i binâ olduğunu tarafeyn muvâcehelerinde ihbâr eylediklerinde mezbûrân dahi tasdîk etmeleriyle ol-vechile mahâll-i mezkûre kadîmi üzere iki zirâ‘ olarak bir aded kepenk vaz‘ıyla dükkân binâ olunmakda kimesneye zarar-bîni olmadığı erbâb-ı vukūf mezbûrûnun haberleriyle zâhir ve mütehakkık olmağın mutasarrıfesi Nasrâniye-i mersûmenin vech-i meşrûh üzere binâsına mesâğ-ı şer‘î olmağla izin verilmek iktizâ eylediği İstanbul Mahkemesi’nden huzûr. Fî 20 Receb sene [12]23.