İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 506 Hüküm no: 494 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihanbeyli aşiretinden Alişan Beyzade Celep Ömer Bey ile kasap kethuda ve ustaları arasında koyun eti, kuyruk yağı ve sakatatların fiyatı üzerinde anlaşma sağlandığı Ağnâm Ma‘rûz Sekene-i Dârü’s-Saltanati’l-Aliyye’nin tevsî‘-i dâire-i ma‘âşları’çün bu esnâda Anadolu cânibinden Âsitâne-i aliyye’ye on beş bin re’s mikdârı ağnâm sevk ve tesyîr eden Cihanbeyli Aşîreti’nden sâhib-i arzuhâl Alişan Beyzâde Ömer Bey meclis-i şer‘-i hatîrde Dergâh-ı âlî yeniçerileri ağası izzetlü ağa bendeleriyle Hâssa Kasabbaşısı Ser-bevvâbîn-i Dergâh-ı âlî izzetlü Mustafa Ağa kulları hâzır oldukları hâlde Kassâbân Kethudâsı Ahmed ve ustalarından Hafız el-Hâc Mehmed Emin ve es-Seyyid el-Hâc Osman ve Abdulkadir ve es-Seyyid Molla Hasan ve Mercanlı el-Hâc Osman ve sâir mazbûtü’l-esâmî kasab ustaları muvâcehelerinde işbu sene-i mübârekede mahâllinde cem‘ ü tedârük ve sevk [ve] tesyîr eylediğim ağnâmın herbirini sene-i sâbıkā fiyâtından ziyâde bahâ ile iştirâ olunduğundan mâ‘adâ esnâ-i tarîkde dahi mesârif-i kesîreden bahisle tazallüm-i hâl ve istirhâm eylediğine binâen irâde-i aliyye buyurulduğu vech üzere celeb tâifesinin zarar ve hasardan vikāyetleri lâzımeden olmağla ibâdullâha mazarratı olmayacak vechile beher vakıyye lahmı narh-ı sâbık üzere yirmi iki paraya ve kuyruk yağının beher vakıyyesi kırk paraya ve Eylül duhûl etmiş olmağla ağnâm sakatlarını narh-ı sâbıkına sekizer para zam ile beher sakatı otuz paraya iblâğ olunarak bi’t-terâzî kat‘-ı fiyât olunup vech-i meşrûh üzere bey‘ ü şirâya tarafeyn râzılar olmalarıyla kassâbân esnâfı dahi ber-vech-i muharrer luhûmunu ve kuyruğunu ve sakatlarını mukāvele olunan fiyât-ı mezkûre üzere celeb tâifesi merkūm ile hesâplaşıp ziyâde ve noksân mutâlebesi teklifiyle herbiri âhara rencîde etmeyip yevm-i tevzî‘den otuz bir gün mürûrunda yâfteleri verilip kezâlik yevm-i tevzî‘den kırk bir gün mürûrunda akçelerini tamamen edâ ve teslîm etmek üzere müte‘ahhidler olup bu vechile kat‘-ı fiyât olunduğu İstanbul Mahkemesi’nden huzûr. Fî 21 B sene [1]223.