İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 507 Hüküm no: 495 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pişirilecek has ekmek sadece Beykoz ve Yalıköy’de satılmak şartıyla Boğaziçi’nde bir adet francala fırını açılmasına izin verildiği Fazîletlü atûfetlü İstanbul kādısı efendi hazretleri Fırın-ı mezkûre ve tabh olunacak nân-ı azîzin bey‘i fakat Beykoz ve Yalıköyü’ne münhasır olmağla ruhsat verilmesinde beis ve hücnet olmadığı zâhir ise de kâffe-i nizâm-ı habbâzâna nezâretleri şâmil olmağla husûs-ı mezbûrun iktizâ-yı hüsn-i nizâmını i‘lâma himmet buyuralar. Francalacı fırını Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye bi’l-külliye sedd ü bend olunduğu derkenârdan müstebân iken bundan mukaddemce vâlid-i mâcid-i hazret-i şehriyârî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nden bir aded ve Çelebi Hasan Paşa Vakfı’ndan Kumkapı hâricinde bir aded ve Kethudâ-yı Sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded francalacı fırınları ki cem‘an beş aded fırınlar sâire sirâyet etmemek ve emsâl tutulmamak şartıyla beş aded fırınların küşâdıyla on iki adede iblâğı husûsuna irâde-i seniyye ta‘alluk etmekle zikr olunan beş aded francalacı fırınlarının küşâdı ruhsatını hâvî şeref-yâfte-i sudûr olan fermân-ı âlî-şân mûcebince küşâd olunmuş [72b] olup bu sûretde küşâdı istid‘â olunan fırın Boğaziçi’nde kâğıd i‘mâl olunan kârhâne-i âmire civârında ve tabh olunacak nân-ı azîzin bey‘i fakat Beykoz ve Yalıköyü’ne münhasır olup nân-ı hâs tabh ve i‘mâline ruhsat verilmesinde beis ve hücnet olmadığı bedîhî olmağla fırın-ı mezkûrun küşâdı irâde-i aliyyeye menût mevâddan idiği İstanbul Mahkemesi’nden huzûr. Fî 27 B sene [12]23.