İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 508 Hüküm no: 496 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Antran bt. Mıgırdıç ile oğulları Matos ve Mıgırdıç’ın tülbentçi dükkânı gediği hisselerine haksız yere müdahale etdiği iddiasıyla Tülbentçi Ovannes aleyhine açtıkları davada iddialarını ispat edemedikleri Dülbendci gediği mâddesi Ma‘rûz İstanbul’da Langa-i kebîr kurbünde Alacamescid mahallesinde mütemekkin iken bundan akdem hâlik olan dülbendci esnâfından Ateşoğlu Serkiz v. Tatyos nâm zimmînin verâseti zevcesi Antran bt. Mıgırdıç nâm Nasrâniye ile sulbî kebîr oğlu Matos ve sagīr oğlu Mıgırdıç’a ba‘de’l-inhisâr sâhib-i arzuhâl kendi nefsinden asîl ve sagīr-i mersûmun min-kıbeli’ş-şer‘ vasî-i mansûbesi şahsı mu‘arrefe zevce-i mersûme Antran Nasrâniye ile mersûm Matos zimmîden herbiri meclis-i şer‘-i münîrde zikri âtî dülbendci gediğinin nısf-ı şâyi‘ine vaz‘-ı yedi mütehakkık olan derûn-ı arzuhâlde mastûrü’l-ism Dülbendci Ovannes v. Karabet zimmî muvâcehesinde İstanbul Uzunçarşı nâm mahâlde macuncu dükkânı civârında vâki‘ bir bâb dülbendci dükkânı derûnunda mevcûde beyne’l-esnâf gedik ta‘bîr olunan âlât-ı lâzıme-i ma‘lûme müstakıllen mûrisimiz hâlik-i mesfûrun sağlığında ve yedinde mülkü olmağla âlât-ı lâzıme-i merkūmenin nısf-ı şâyi‘i helâkinden sekiz sene mukaddem işbu mesfûr Ovannes zimmîden karz aldığı bin iki yüz guruş deyni mukābelesinde her ne zaman meblağ-ı mezbûru edâ eder ise redd ü teslîm etmek üzere mesfûr Ovannes zimmîye bey‘ bi’l-vefâ’ tarîkıyla bey‘ ve vech-i lâyıkı üzere teslîm ol dahi ber-vech-i muharrer ba‘de’l-iştirâ ve’t-tesellüm meblağ-ı mezbûru edâ etmeksizin zevcim mesfûr hâlik olup âlât-ı lâzıme-i mezkûre bize mevrûs olmağla hâlâ meblağ-ı mezbûru kendüye edâ ve teslîm birle nısf-ı âlât-ı lâzıme-i mezkûreden keff-i yedine mesfûr Ovannes zimmîye tenbîh olunmak bi’l-verâse ve bi’l-vesâye matlûbumdur deyü da‘vâ etdiklerinde ol dahi cevâbında müdde‘iyân-ı mersûmânın mûrisleri hâlik-i mesfûr Ateşoğlu Serkiz zimmî helâkinden sekiz sene mukaddem sağlığında mâlik olduğu âlât-ı lâzıme-i mezkûrenin nısfını mülkünde ibkā ve nıfs-ı şâyi‘-i âharını tarafeynden bi’l-îcâb ve’l-kabûl bâtten ve sahîhan bi-safkatin vâhidetin meblağ-ı merkūm bin iki yüz guruş semen-i medfû‘ ve makbûza bana bey‘-i kat‘î ile bey‘ ü temlik ve teslîm ben dahi ber-vech-i muharrer iştirâ ve temellük ve tesellüm ve kabz ü kabûl edip ol-vechile nısf-ı âlât-ı lâzıme-i mezkûre mülk-i müşterâm olup ancak nısf-ı şâyi‘inde kendinin kat‘a alâka ve medhali kalmayıp mebî‘-i mezkûrun tağrîr ve gabnine ve bi’l-cümle nısf-ı gedik-i mezkûra müte‘allika âmme-i da‘vâdan benim zimmetimi ibrâ-i âmm-ı sahîh-i şer‘î ile ibrâ ve iskāt etmekle ben dahi ibrâ-i mezkûrunu kabûl eylediğimden sonra sekiz sene mürûrunda mesfûr Serkiz hâlik oldukda veresesi müdde‘iyân-ı mersûmân bin iki yüz yirmi bir senesi Rebî‘ülevvel gurresinden İstanbul kādısı olan Ali Paşa hafîdi sa‘âdetlü fazîletlü Abdullah Beyefendi’nin zaman-ı hükûmetinde huzûrunda husûs-ı mezkûru bi-aynihî benden da‘vâ ben dahi ber-minvâl-i meşrûh def‘imi sâbıkā Dülbendciler Kethudâsı Abdullah Ağa b. Abdullah nâm kimesne ile yine esnâf-ı merkūmeden Avadis v. Serkiz ve Mıgırdıç v. Ovannes nâm zimmîler şehâdetleriyle muvâcehelerinde isbât etmemle kādı-i mûmâ-ileyh dahi şâhidûn-ı merkūmûnu ba‘de’t-tezkiye şehâdetlerin kabûl ve mûcebiyce hükmedip müdde‘iyân-ı mersûmân nısf gedik mutâlebesiyle bî-vech-i şer‘î mu‘ârazadan men‘ olunmuşlardır deyü mazmûnu min-külli’l-vücûh takrîrine mutâbık ve kādı-i mûmâ-ileyhin hatmiyle mahtûm bir kıt‘a i‘lâm-ı şer‘î ibrâzıyla eylediği def‘ini ve mazmûn-ı i‘lâm-ı mezkûru müdde‘iyân-ı mesfûrân Matos zimmî ve Antran Nasrâniyeden herbiri ikrâr ve tasdîk etmeleriyle mûcebince müdde‘iyân-ı mersûmân da‘vâ-yı mezkûreleriyle mesfûr Ovannes zimmîye bu def‘a dahi bî-vech-i şer‘î mu‘ârazadan men‘ olundukdan sonra tekrar müdde‘iyân-ı mersûmân meclis-i mezkûrda mersûm Ovannes zimmî muvâcehesinde herbiri i‘âde-i kelâm edip mûrisimiz hâlik-i mesfûr Dülbendci Ateşoğlu Serkiz zimmîden <> sağlığında meblağ-ı mezbûr için ilzâm-ı ribh olunmadan altı sene sekiz ay müddetde murâbaha nâmıyla beher şehr on beşer guruşdan cem‘an bin iki yüz guruş bi-gayrı hakkın ahz etmişdin taleb ederim, ederiz deyü bi’l-verâse ve bi’l-vesâye eyledikleri da‘vâlarını mersûm Ovannes zimmî külliyen inkâr edip müdde‘iyân-ı mersûmân ber-vech-i muharrer müdde‘âsına ikāmet-i beyyineden izhâr-ı acz birle talebiyle mesfûr Ovannes zimmî vech-i şer‘î üzere tahlîf olunmağın mûcebiyle müdde‘iyân-ı mesfûrân da‘vâ-yı mezkûreleriyle mersûm Ovannes zimmîye bilâ-beyyine mu‘ârazadan men‘ olundukları İstanbul Mahkemesi’nden huzûr. Fî 18 Receb sene [12]23.