İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 510 Hüküm no: 497 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Mehmed Sadık’ın haksız yere bir miktar eşya ve parasını aldığı iddiasıyla boşandığı karısı Fatma aleyhine açtığı davada iddiasını ispat edemediği 300 guruş ile eşyâ men‘i Ma‘rûz Derûn-ı arzuhâlde mezkûrü’l-ism Kömürcü es-Seyyid Mehmed Sadık b. Ali nâm kimesne meclis-i şer‘-i münîrde zevce-i mutallakası sâhibe-i arzuhâl mu‘arrefetü’z-zât Fatma bt. Numan [nâm] hatun muvâcehesinde mezbûre Fatma Hatun zevcem olup bundan akdemce mezbûreyi tatlîk eylediğimden sonra birkaç gün mürûrunda ben taşra âzim olduğumda mezbûre Fatma Hatun menzilime gelip sandığımda mahfûz malımdan nakid üç yüz guruşumu ve yüz elli guruş hediyeli bir Mushaf-ı şerîf ve kırk guruş kıymetli dört gömlek ve on sekiz guruş kıymetli üç don ve on iki guruş kıymetli bir futa ve altı guruş kıymetli bir havlu ve üç guruş kıymetli bir destâr pûşîdemi bi-gayrı hakkın ahz etmekle nakd-i merkūm ile eşyâ-i muharrere-i merkūmeyi hâlâ taleb ederim deyü eylediği da‘vâsını merkūme Fatma Hatun külliyen inkâr edip ve müdde‘î-i merkūm ber-vech-i muharrer müdde‘âsına ikāmet-i beyyineden izhâr-ı acz birle bi’t-taleb mezbûre Fatma Hatun vech-i şer‘î üzere tahlîf olunmağın mûcebince müdde‘î-i merkūm es-Seyyid Mehmed Sadık da‘vâ-yı mezkûresiyle mezbûre Fatma Hatun’a bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 26 B sene [1]223.