İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 511 Hüküm no: 499 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hicrî 1223 senesinin Receb ayının yirmi yedinci Pazartesi gecesinin Mirac gecesi olması münasebetiyle camilerde ve minarelerde kandiller yakılmasının ilgililere tenbih olunduğu Bâ-sah İstanbul kādısı izzetlü fazîletlü efendi hazretleri İşbu i‘lâmınız rikâb-ı müstetâb-ı şâhâneye arz ile meşmûl-i enzâr-ı cihandârî olmağla mûcebince leyle-i mezkûrede îkād-ı kanâdîl olunmasını iktizâ edenlere tenbîhe himmet eyleyesiz deyü buyuruldu. 26 B sene [12]23. Mi‘râc-ı şerîf i‘lâmı Ma‘rûz Dergâh-ı felek-bünyân ve bârgâh-ı âsumân-unvânlarına ma‘rûz-ı dâ‘î-i şâkirü’l-ihsânlarıdır ki Cenâb-ı hazret-i Resûlü’s-sakaleyn vâsıl-ı ser-menzil-i kâb-ı kavseyn ol yektâ süvâr-ı serhîl-i gürûh-ı enbiyâ-i sipehsâlâr sübhânellezî esrâ habîb-i Hudâ şefî‘-i rûz-ı cezâ Ebe’l-Kasım Muhammedini’l-Mustafâ -aleyhi efdalü’s-salavât ve ezka’t-tehâyâ- hazretlerinin mi‘râc-ı ber-ibtihâcları vâki‘ olduğu işbu mâh-ı Receb-i şerîf gurresi hâlâ bi’r-rü’ye sâbite olmayıp şehr-i Cumâdelâhire tekmîl-i selâsîn ile itmâm ve mâh-ı mübârek Recebi’l-ferd yevm-i erbi‘â ibtidâ-yı i‘dâd-ı eyyâm olduğuna binâen işbu yirmi yedinci isneyn gecesi olmağla âdet-i hasene-i Devlet-i Aliyye ve deydene-i müstahsene-i Saltanat-ı seniyye üzere minârât-ı cevâmi‘-i câmi‘atü’l-berekât îkād-ı kanâdîl ile tenvîr ve ol leyle-i mübâreke bu vechile tebcîl ve tevkīr olunmağla bi’l-cümle kulûb-ı müminîn safâ-rehîn ve neşât-karîn olmaları’çün selâtîn-i âlî-şân nevverallâhu merâkidehüm bi-envâri’l-gufrân ve’l-ihsân hazerâtı cevâmi‘-i şerîfeleri kayyımlarına bâ-fermân-ı âlî tenbîh olunmak iktizâ eylediği İstanbul Mahkemesi’nden dergâh-ı felek-medâr ve bârgâh-ı gerdûn-i‘tibârları türâbına i‘lâm olundu bâkī emr ü fermân li-hazreti men-lehü’n-ni‘metü ve’l-ihsân fi’l-yevmi’l-hâmis ve’l-ışrîn min-Recebi’l-ferd li-sene selâse ve ışrîn ve mi’eteyn ve elf.