İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 513 Hüküm no: 501 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâhîcioğlu Kigork’un Şehzade Camii civarındaki iki adet ütücü dükkânındaki gedik hisselerinin yarısını Ohan v. Manuk’a bin yüz kuruşa devrettiği Ütücü gediği mâddesi Ma‘rûz Hüdavendigâr-ı esbak cennet-mekân firdevs-âşiyân Sultan Mustafa Han -aleyhi’r-rahmetü ve’l-gufrân- hazretlerinin mahmiye-i İstanbul’da Laleliçeşme kurbünde vâki‘ câmi‘-i şerîf ve imâret-i âmire ve hayrât-ı sâire-i celîleleri evkāfı müstegallâtından mahmiye-i mezbûrede Şehzâde Câmi‘-i şerîfi kapısı ittisâlinde kâin bir bâb ütücü dükkânı derûnunda mevcûde gedik ta‘bîr olunan âlât-ı lâzıme-i ma‘lûmenin mecmû‘una ve yine zikr olunan Şehzâde Câmi‘-i şerîfi civârında Meyyit kapısı nâm mahâlde bakkāl dükkânı karşısında kâin bir bâb ütücü dükkânı derûnunda mevcûde gedik ta‘bîr olunan âlât-ı lâzıme-i ma‘lûmenin dört sehm i‘tibârıyla iki sehm-i şâyi‘lerine vakf-ı müşârün-ileyh temessüküyle mutasarrıf olan Kâhîcioğlu Kigork v. Kazar zimmî meclis-i şer‘-i münîrde esnâf-ı merkūmenin kethudâsı İsmail ve ihtiyârlarından Mahmud Usta ile Yiğitbaşı Karabet ve Ustabaşı Kerope ve Andon ve Serope nâm zimmîler hâzır oldukları hâlde ütücü ustalığını idâreye muktedir olduğu ihbâr olunan bâ‘isü’l-i‘lâm sâhib-i arzuhâl Ohan v. Manuk zimmî muvâcehesinde takrîr-i kelâm edip zikr olunan câmi‘-i şerîf kapısı ittisâlinde kâin bir bâb ütücü dükkânı derûnunda mevcûde müstakıllen mutasarrıf olduğum âlât-ı lâzıme-i mezkûrenin nısf-ı şâyi‘ini tasarrufumda ibkā ve mâ‘adâ nısf-ı şâyi‘i ile mârrü’z-zikr Meyyit kapısı nâm mahâlde vâki‘ bir bâb ütücü dükkânı derûnunda mevcûde âlât-ı lâzıme-i ma‘lûmenin i‘tibâr-ı merkūm üzere kezâlik mutasarrıf olduğum iki sehm hisse-i şâyi‘amın bir sehmini tasarrufumda ibkā ve mâ‘adâ bir sehm-i şâyi‘ini hüsn-i rızâ ve tayyib-i hâtırımla bin yüz guruş bedel-i makbûz mukābelesinde bâ-re’y-i mütevellî mersûm Ohan zimmîye ferâğ-ı kat‘î-i mu‘teber ile ferâğ ve tefvîz eylediğimde ol dahi tefevvüz ve kabûl edip ba‘de’l-yevm zikr olunan câmi‘-i şerîf kapısı ittisâlinde kâin ütücü dükkânı gediği ta‘bîr olunan âlât-ı lâzıme-i ma‘lûmenin nısf-ı şâyi‘i ile Meyyit kapısı nâm mahâlde bakkāl dükkânı karşısında olan ütücü dükkânı gediği ta‘bîr olunan âlât-ı lâzıme-i ma‘lûmesinin i‘tibâr-ı merkūm üzere bir sehm-i şâyi‘i mersûm Ohan zimmînin hakk-ı müfevvezi ve dâhil-i havza-i tasarrufu olup sâlifü’z-zikr nısf ve rub‘ hisselerinde benim alâka ve medhalim kalmamışdır dediğini mersûm Ohan zimmî tasdîk etmeğin âlât-ı lâzıme-i mezkûrelerin vech-i meşrûh üzere nısf ve rub‘ hisseleri fâriğ-i mersûm Kigork zimmînin ferâğından mersûm Ohan zimmî üzerine müceddeden temessük tahrîr ve temhîr ve vakf-ı şerîfe ba‘de’l-kayd yedine i‘tâ olunmak bâbında istid‘â eylediği İstanbul Mahkemesi’nden huzûr. Fî 23 B sene [12]23.