İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 514 Hüküm no: 502 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa ile karısı Habibe Hatun’un Abbasağa mahallesindeki arsalarına müdahale ettiği iddiasıyla Çolak Hüseyin Çavuş aleyhine açtığı davada anlaşmazlık konusu olan yerin keşfolunduğu İhrâc şüd. Fî 18 Receb sene 1251 Damlalık keşfi Beşiktaş’da. Ma‘rûz Sâdır olan fermân-ı âlîlerine imtisâlen kıbel-i şer‘-i enverden mürsel keşif nâibimiz Merhabazâde Mahmud Efendi ve bi’l-ma‘iye rü’yete memûr nezâret-i hazret-i şeyhülislâmîde âsûde evkāf müfettişi müderrisîn-i kirâm-ı zevi’l-ihtirâmdan Üryanîzâde fazîletlü Mehmed Râşid Efendi tarafından mürsel İmâmzâde Ali Efendi hâssa mi‘mârı hulefâsından es-Seyyid Mustafa ve Selim Sâbit halîfeler ile mahrûse-i Galata muzâfâtından Beşiktaş kasabasında Abbasağa mahallesinde vâki‘ zikri âtî münâza‘un-fîhâ olan arsaya varıp cerîdede mazbûtü’l-esâmî Müslimîn huzûrlarında bi’l-ma‘iye akd-i meclis-i şer‘-i kavîm eylediklerinde sâhib-i arzuhâl Ahmed Ağa ve zevcesi zâtı mu‘arrefe olan Habibe bt. Abdullah meclis-i ma‘kūd-ı mezkûrda derûn-ı arzuhâlde mezkûrü’l-ism kalyonî çavuşlarından Çolak Hüseyin Çavuş b. Ali mahzarında nezâret-i hazret-i müşârün-ileyhde âsûde evkāfdan merhûm Kapudan Sinanpaşa Vakfı mütevellîsi tarafından mürsel vekîli Hafız İbrahim Efendi ve es-Seyyid Halil Efendi Vakfı’nın mütevellîyesi Şerife Nefise Hanım tarafından mürsel vekîli es-Seyyid Hafız Mahmud Efendi hâzırân oldukları hâlde işbu derûnunda akd-i meclis-i şer‘-i âlî olunan mi‘mârân-ı mezbûrân mesâhaları üzere tûlen on üç zirâ‘ altı parmak ve arzen sekiz zirâ‘ sekiz parmak arsanın tûlen on üç zirâ‘ mevcûd odaya varınca bir zirâ‘ altı parmak mahâlli mezbûr Çolak Hüseyin Çavuş’un damlalık mahâlli olup mâ‘adâ mahâlli bizim es-Seyyid Halil Efendi Vakfı’ndan bi’l-icâreteyn tasarrufumuzda olmağla merkūm Hüseyin Çavuş bi-gayrı vechin ta‘arruz etmekle müdâhalesi men‘ ü def‘ olunmak matlûbumuzdur deyü mütevellîye vekîli hâzır-ı mezbûrun tasdîkiyle da‘vâ etdiklerinde ol dahi inkâr ve beynlerinde ba‘de vukū‘i’l-münâza‘a mezbûr Hüseyin Çavuş fîmâ-ba‘d damlalık mahâllinden mâ‘adâsına müdâhale etmemek üzere ta‘ahhüd ve bu vechile kat‘-ı münâza‘a eylediklerini mevlana-yı mezbûrân mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 23 B sene [1]223.