İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 518 Hüküm no: 508 Orijinal metin no: [74a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a getirilecek Tekirdağ buğdayının kilesinin habbaz taifesine doksanar paraya verileceği Fiyât husûsuna dâir Ma‘rûz Bi-inâyetillâhi te‘âlâ işbu sene-i amîmetü’l-meymenede mahsûl-i cedîd zuhûr etmekle etrâf ve enhâdan Dersaâdet’e külliyetlü zehâir celbi lâzımeden olduğuna mebnî ber-mu‘tâd-ı kadîm kapan tüccârı ile habbâzân esnâfının beynlerinde bi’t-terâzî fiyâtını kat‘ ve tanzîmi bâbında bu dâ‘îlerine hitâben şeref-yâfte-i sudûr olan fermân-ı âlîlerine imtisâlen kapan nâibimiz efendi ve anbar emîni efendi dâ‘îleri hâzır oldukları hâlde kapan tüccârından el-Hâc Mehmed Emin Ağa ve el-Hâc İsmail Ağa ve el-Hâc Ahmed Ağa ve Abdullah Ağa ve Hafız Ali Efendi ve es-Seyyid el-Hâc Osman Ağa ve İbrahim Ağa ve Hasan Ağa ve sâirleri ile Habbâzân Kethudâsı Mustafa Ağa ve Uncular Kethudâsı es-Seyyid Mustafa Ağa ve nizâm ustalarından es-Seyyid İsmail ve Mehmed Ağa Câmili İsmail, Darıcahamamlı İsmail [74b] ve Fazlı ve Ömer ve Ali nâm kimesneler ile re‘âyâ ustalarından Haçok ve Kirkor ve diğer Kirkor ve Ağya ve Manol ve Agop ve Bogos ve sâirleri meclis-i şer‘a ihzâr olunup mazmûn-ı emr-i âlî kendilere ifâde ve tefhîm ve işbu zehâir mâddesi etrâfıyla müzâkere ve istintâk olundukda Tekfurdağı hıntasının beher keyli keyl-i İstanbûlîden ziyâde olmağla kile başı fâidesine kanâ‘at olunarak Der-aliyye’de beher keyli habbâzân tâifesine doksanar paraya verilmek üzere bi’t-terâzî kat‘-ı fiyât olunup bi-avnihî sübhânehû ve te‘âlâ ucâleten Dersaâdet’e külliyetlü zehâir celb olunmasına ikdâm olunarak mahâllinde muhtekir tâifesi ve ashâb-ı çiftlikân ve mültezimîn iddihâr-ı zehâirden men‘ ve yedlerinde olan zahîrelerini derhâl iskeleye nakl ve fiyât-ı maktû‘a-i mezkûre ile tüccâra bey‘ eyleyip habbe-i vâhide ketm ve ihtikâra cesâret ederi olur ise tedîb olunmaları bâbında müekked emr-i celîlü’ş-şân ısdâr ve irsâli muktezâ-yı maslahatdan idiği İstanbul Mahkemesi’nden huzûr. Fî 29 Receb sene [1]223.