İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 519 Hüküm no: 509 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino bt. Filip’in tasarrufunda olan yanmış değirmen arsası üzerine yaptırdığı binayı üç yüz elli kuruş bedel karşılığından Galata Berberler Kethudası Mustafa Çelebi’ye devrettiği Galata’da menzil havası ferâğı Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden şahsı mu‘arrefe Despino bt. Filip nâm Nasrâniye Çarşamba günü arz odasında huzûr-ı hazret-i sadâret-penâhîde Haremeyn-i Şerifeyn müfettişi müderrisîn-i kirâm-ı zevi’l-ihtirâmdan Paşmakcızâde fazîletlü es-Seyyid Mehmed Zeki Efendi hâzır olduğu hâlde akd olunan meclis-i şer‘de derûn-ı arzuhâlde mezkûrü’l-ism Galata Berberler Kethudâsı es-Seyyid Mustafa Çelebi b. es-Seyyid el-Hâc Ahmed mahzarında Dârü’s-sa‘âdeti’ş-şerîfe ağası hazretlerinin nezâretlerinde âsûde evkāfdan Mercan Ağa Câmi‘-i şerîfinde eczâ-i şerîfe ve minber vaz‘ eden Frenk Ali Ağa Vakfı’nın mütevellîsi Halil Efendi tarafından mürsel câbî-i vakf Türbedârzâde Mustafa Efendi hâzır olduğu hâlde vakf-ı mezbûr müsakkafâtından olup Galata’da Eğrikapı dâhilinde kâin beher şehr otuz akçe icâre-i müecceleli ma‘lûmü’l-hudûd menzil arsası üzerinde olan binâsıyla ber-mûceb-i temessük mütevellî benim ve ittisâlinde beher şehr altmış akçe icâre-i müecceleli bir kıt‘a değirmen arsası üzerine olan binâsıyla bâ-temessük-i mütevellî mezbûr es-Seyyid Mustafa Çelebi’nin taht-ı tasarrufumuzda iken menzil ve değirmen-i mezkûrlar bundan akdem vukū‘ bulan harîkde muhterik olup arsa-i sırfa kaldıkdan sonra mezbûr es-Seyyid Mustafa değirmen-i mezkûru ben dahi menzil-i merkūmu herbirimiz binâya şürû‘ eylediğimizde benim işbu yedimde olan mütevellî temessükü mantûkunca değirmen-i mezkûrun terbî‘an yirmi beş zirâ‘ mahâllinin ulvî mutasarrıf olduğum menzil-i mezkûr müştemilâtından olmak üzere taht-ı tasarrufumda olduğuna binâen kadîmi üzere ol-mikdâr mahâllinin ulüvvüne oda binâ etmek murâd eylediğimde mezbûr es-Seyyid Mustafa bir takrîb beni men‘ ve zikri mürûr eden ol-mikdâr ulüvv mahâllini fuzûlî zabt etmekle mahâll-i mezkûrdan keff-i yedine merkūm es-Seyyid Mustafa Çelebi’ye tenbîh olunmak matlûbumdur deyü mütevellî vekîli hâzır-ı mezbûrun tasdîkiyle da‘vâ eylediğimde mezbûr es-Seyyid Mustafa dahi müdde‘âmı tasdîk lâkin değirmen-i mezkûr ve gerek menzil-i merkūm ebniyeleri tekmîl olmuş olduğuna mebnî beynimize muslihûn tavassut edip ben ber-vech-i muharrer mutasarrıf olduğum terbî‘an yirmi beş zirâ‘ ulüvv mahâllini beher şehr yedi buçuk akçe icâre-i müeccele ifrâz ve ta‘yîniyle üç yüz elli guruş bedel-i makbûz mukābilesinde bâ-re’y-i mütevellî mezbûr es-Seyyid Mustafa Çelebi’ye ferâğ-ı kat‘î-i mu‘teber ile ferâğ ve tefvîz eylediğimde ol dahi ber-vech-i muharrer tefevvüz ve kabûl edip ben mahâll-i mezkûra ol dahi bana medfû‘u olan bedel-i merkūmun adem-i istifâsına ve hukūk-ı sâireye müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyledik dediğini mezbûr es-Seyyid Mustafa Çelebi tasdîk ve mütevellî vekîli hâzır-ı mezbûr dahi Nasrâniye-i mersûmenin mutasarrıfe olduğu menzil-i merkūmun şehriye otuz akçe icâre-i müeccele-i mezkûresinden bâlâda zikr olunduğu üzere ancak yedi buçuk akçesini ifrâz edip sâlifü’z-zikr ol-mikdâr ulüv mahâlli’çün bi’t-terâzî ta‘yîn birle merkūm es-Seyyid Mustafa Çelebi’nin tasarrufuna izin verip bu vechile külliyen kat‘-ı münâza‘a eyledikleri İstanbul Mahkemesi’ne huzûr. Fî 24 Receb sene [1]223.