İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 520 Hüküm no: 510 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saray-ı hümayunun yüklerini taşımakla görevli olan on nefer hamalın başka işlerde görevlendirilmemesi için 1189 tarihli emir gibi ellerine yeni bir emir verilmesinin talep olunduğu Saray hamalları Ma‘rûz Saray-ı atik-i ma‘mûre bâzârbaşısı Hasan Ağa kullarının dîvân-ı âlîye takdîm eylediği işbu arzuhâl mefhûmunda Zindan Kapısı dâhilinde vâki‘ sırık hamalları tâifesinden es-Seyyid Ahmed Kethudâ ve Ebûbekir b. Ebîbekir ve Hüseyin b. Hasan ve Mehmed b. Ali ve Hüseyin b. Ahmed ve Mehmed b. Hüseyin ve Osman b. Hüseyin ve Ahmed b. Hasan ve Veliyüddin Ali ile zimmîlerden Avak v. Serkiz nâm on nefer hamallar kadîmü’l-eyyâmdan beri gümrükden ve gerek karşıdan ve sâir mahallerden gelen yükleri der-mahzen ve saray-ı hümâyûna nakledegelmişler iken tâife-i mezbûrenin kethudâları ve bölükbaşıları beylik iş vardır deyü beylik nâmıyla zecren on beş yirmi gün işledip bir akçe vermediklerinden mâ‘adâ Saray-ı atik ve Saray-ı Galata’nın umûru ta‘tîline bâ‘is olmalarıyla zikr olunan on nefer hamallar saray-ı hümâyûn zahîresi nakline memûr olmalarıyla sâir mîrî hizmetde istihdâm olunmamak üzere hâmiş-i arzuhâle kaydı derkenâr olunup bin yüz seksen dokuz târihinde verilen emr-i âlî misillü bu def‘a dahi bir kıt‘a emr-i âlî-şân i‘tâsını istid‘â ve fi’l-hakīka tâife-i merkūmûnun nizâm-ı kadîmleri vech-i meşrûh üzere olduğu erbâb-ı vukūf ihbârlarıyla zâhir ve nümâyân olmağın derkenârı mûcebince bâlâda mezkûr on nefer hamalların isimleri derciyle tecdîdi hâvî bir kıt‘a fermân-ı âlî-şân inâyet ve ihsân buyurulmak bâbında istirhâm eyledikleri İstanbul Mahkemesi’nden huzûr. Fî-gurreti Ş sene [1]223.