İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 520 Hüküm no: 511 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mustafa’nın Minas v. Agyazar ile karısı Miyanzara aleyhine açtığı menzil ferağı davasında seksen kuruşa sulh olduğu Menzil mâddesi Ma‘rûz Derûn-ı arzuhâlde mezkûretü’l-ism mu‘arrefetü’z-zât Emine bt. Mustafa nâm hatun bi’l-ma‘iye rü’yete memûr Haremeyn-i Şerifeyn müfettişi müderrisîn-i kirâmdan Paşmakcızâde fazîletlü es-Seyyid Mehmed Zeki Efendi tarafından mürsel Kâtib es-Seyyid Mehmed Râcih Efendi hâzır olduğu hâlde du‘âhâne-i dâ‘îlerinde ma‘kūd meclis-i şer‘-i münîrde arzuhâl eden Simyon nâm zimmînin babası Minas v. Ağyazar zimmî ile anası Miyanzara bt. İsayi nâm Nasrâniye muvâcehelerinde mesfûr Minas zimmî ile zevcesi mersûme Miyanzar[a] Nasrâniye bundan akdem yedimden ve malımdan karz aldıkları üç yüz guruş mukābelesinde Saray-ı atik-i sultânî ağası nezâretinde âsûde evkāfdan merhûm Arakıyeci İbrahim Çavuş Vakfı müsakkafâtından İstanbul’da Topkapı dâhilinde hisâr ittisâlinde vâki‘ beher şehr otuz akçe icâre-i müecceleli bir bâb vakıf menzilin dört sehm i‘tibârıyla iki sehmi mesfûr Minas zimmînin ve bir sehmi zevcesi mersûme Miyanzara Nasrâniyenin ve bir sehmi dahi mersûme Miyanzara’nın anası Dudu bt. Kiragos Nasrâniyenin tasarruflarında olmağla mersûmûn mutasarrıflar oldukları menzil-i mezkûru bin iki yüz on senesi Rebî‘ülâhir’inin on beşinci günü her ne zaman meblağ-ı mezkûru bana edâ ederler ise [75a] redd-i ferâğ etmek üzere bâ-ma‘rifet-i mütevellî bana ferâğ ve kasr-ı yed etmeleriyle ben dahi ol şartla tefevvüz ve kabûl etmiş idim hâlâ mersûme Dudu Nasrâniye hâlike olup kızı mersûme Miyanzara Nasrâniye ile zevci mersûm Minas zimmî meblağ-ı merkūm üç yüz guruşu bana edâ birle menzil-i mezkûru bâ-ma‘rifet-i mütevellî redd-i ferâğ eylemelerine tenbîh olunmak matlûbumdur deyü vakf-ı mezbûr mütevellîsi İsmail Efendi tarafından mürsel câbi-i vakf Hafız Abdurrahim b. Yusuf hâzır olduğu hâlde da‘vâ eylediğimde onlar dahi cevâblarında meblağ-ı mezbûr için ilzâm-ı ribh olunmadan sana yüz elli yedi ayda beher şehr beşer guruşdan cem‘an yedi yüz seksen beş guruş vermemizle meblağ-ı merkūmun üç yüz guruşu deyn-i mezkûra takas ve mahsûb olunup mâ‘adâsı olan dört yüz seksen beş guruşu istirdâd ve menzil-i mezkûr dahi bâ-ma‘rifet-i mütevellî redd-i ferâğ olunması matlûbumuzdur deyü benden da‘vâya tasaddî ve ol-vechile beynimizde ba‘de vukū‘i’l-münâza‘a bâ-vesâtet-i muslihîn ben ber-minvâl-i muharrer tasaddî eylediğim üç yüz guruş mutâlebemden zevcân-ı mersûmân ile bi’t-tav‘ ve’r-rızâ seksen guruş bedel-i makbûza ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâya onlar dahi benden istirdâdına tasaddî eyledikleri meblağ-ı merkūma ve bi’l-cümle zikr olunan husûslara müte‘allika âmme-i da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl ve menzil-i mezkûru zevcân-ı mersûmâna bâ-re’y-i mütevellî ferâğ ve kasr-ı yed eyledim fîmâ-ba‘d menzil-i mezkûrda kat‘a alâka ve medhalim kalmayıp zevcân-ı mersûmânın bi’l-münâsafe dâhil-i havza-i tasarrufları olmuşdur dedikde onlar dahi tasdîk ve mütevellî vekîli hâzır-ı merkūm dahi menzil-i mezkûru zevcân-ı mersûmânın bi’l-münâsafe tasarruflarını re’y eylediği İstanbul Mahkemesi’nden huzûr. Fî 11 B sene [1]223.