İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 522 Hüküm no: 512 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne’deki Lari Camii Vakfı’nın câbîlik ve İstanbul’daki Mustafa Çavuş Vakfı’nın nazırlık vazifelerinin Mehmed Esad Halife’ye tevcihi Cibâyet ve nezâret i‘lâmı Ma‘rûz Hâmiş-i arzuhâlde mastûr derkenâr nâtık olduğu üzere nezâret-i dâ‘îlerinde âsûde olan evkāfdan Edirne’de Lari Câmi‘-i şerîfinde ve İstanbul’da Davudpaşa nezdinde merhûm Mustafa Çavuş Vakfı’nın yevmî beş akçe vazîfe ile cibâyet ve dört akçe vazîfe ile nezâret cihetlerine mutasarrıf olan Mehmed Emin Halîfe v. Kebîr Ali Efendi bundan akdem fevt oldukda ciheteyn-i mezkûreteyn sulbî kebîr oğulları Mehmed Şâkir ve Ali halîfelere kānûn üzere ba‘de’l-intikāl kable’t-tevcîh merkūm Mehmed Şâkir dahi fevt ve işbu sâhib-i arzuhâl Mehmed Esad müteveffâ-yı sânî-i merkūm Mehmed Şâkir’in sulbî sahîh oğlu olduğu udûlden es-Seyyid eş-Şeyh Mehmed Emin Efendi b. el-Hâc Hüseyin ve Halil Efendi b. Hüseyin nâm kimesnelerin haberleriyle mütehakkık olduğundan mâ‘adâ mezbûr Ali Halîfe rızâsıyla nısf hisselerinden keff-i yed etmekle ciheteyn-i mezkûreteyn müteveffâ-yı merkūmun mahlûlünden ve mezbûr Ali Halîfe’nin keff-i yedinden sâhib-i arzuhâl merkūm Mehmed Esad Halîfe’ye tevcîh ve yedine berât-ı şerîf-i âlî-şân inâyet ve ihsân buyurulmak bâbında İstanbul Mahkemesi’nden huzûr. Fî 2 Ş Sene [1]223.