İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 522 Hüküm no: 513 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nevrekop kazasına bağlı Sengirti köyünün deruhdecisi İsmail Efendi’nin kazanın eski naibi Mehmed Reşid Efendi’den üç yüz kuruş alacağı olduğu 300 guruş hüküm Ma‘rûz Rumeli’de Nevrekop Kazâsı’na tâbi‘ Sengirti nâm karye ahâlisinin umûrlarını rü’yete memûr vekîlleri ve deruhdecileri olan el-Hâc İsmail Efendi b. Sâlih nâm kimesne tarafından kabûlüne mevkūfe vekâletle vekîl olduğu es-Seyyid Osman b. İbrahim ve Ahmed Beşe b. Mustafa şehâdetleriyle sâbit olan İbrahim Ağa b. Musa meclis-i şer‘-i münîrde sâbıkā kazâ-i merkūm nâibi olan kuzâtdan Mehmed Reşid Efendi b. Hafız Ali muvâcehesinde mezbûr Mehmed Reşid Efendi bundan akdemce kazâ-i mezbûrda niyâbeti esnâsında karye-i mezbûre toprağında cerîhan vefât eden bir kimesnenin “keşfiye” ve “dem diyeti öşrü” nâmıyla karye-i mezbûre ahâlisinden üç yüz guruş mütâlebe ve birkaç neferini habsetmekle müvekkilim mezbûr el-Hâc İsmail Efendi dahi karye-i merkūme ahâlisinin umûrlarını rü’yete memûr olduğu hasebiyle ahâli-i karye-i mezbûreden habseyledikleri kimesneleri tahlîs zımnında malından işbu mezbûr Mehmed Reşid Efendi’nin bi-gayrı hakkın ahz eylediği üç yüz guruşu müvekkilim mezbûr için bi’l-vekâle istirdâd murâdımdır deyü eylediği da‘vâsı mezbûr Mehmed Reşid Efendi’nin ikrâr ü i‘tirâfıyla sâbit ve meblağ-ı merkūmu müvekkil-i mezbûr için müdde‘î-i vekîl-i mezbûra redd ü teslîme müte‘ahhid olduğu İstanbul Mahkemesi’nden huzûr. Fî-gurreti Ş sene [1]223.