İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 530 Hüküm no: 521 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu esnafının talebi üzerine kethudaları Halil Ağa’nın tekrar kethuda olarak tayin olunduğu Çubukçu kethudâlığı ibkāsı Ma‘rûz Ashâb-ı arzuhâl Âsitâne-i aliyye’de vâki‘ çubukçu esnâfının işçi ustalarından Arnabud Mustafa ve Küçük Arnabud Hüseyin ve Bağçeci Hüseyin ve Edirneli Salih ve Topaloğlu İbrahim ve Şemseddin ve Nifli Ahmed ve Kuşcuoğlu şâkirdi Halil ve Mehmed Ârif ve sâirleri meclis-i şer‘-i münîrde esnâf-ı merkūmenin yiğitbaşısı Osman ve müsinn ü ihtiyâr ustalarından Mustafa ve el-Hâc Hasan ve Ebûbekir ve Derviş Ömer ve es-Seyyid Hasan ve Hüseyin ve Feyzullah ve Mehmed Said ve Mustafa ve Yazıcı Mehmed Tâhir ve Tophâneli Hasan ve Ahmed ve Mahmud ve Tophâneli İsmail ve re‘âyâ ustalarından Artin ve Temyaz ve Melkon ve Davit ve Manuk ve Mıgırdıç ve Kirkor ve Anton ve Zandık ve Varteris ve Kalos ve Yahûd tâifesinden Yanto ve Yako ve Şişman Yako ve Mişon ve Mihal ve Davit ve diğer Yako ve Markado ve Şişman Avram ve sâir Müslim ve zimmîler hâzır oldukları hâlde esnâf-ı merkūme kethudâsı derûn-ı arzuhâlde mezkûrü’l-ism Halil Ağa b. Ali nâm kimesne muvâcehesinde merkūm Halil Ağa esnâfımızın kethudâsı olup bu def‘a şikâyetimizi mutazammın gāib ani’l-meclis Şahbâzoğlu Hasan ve Kör Hüseyin nâm kimesnelerin iğfâl ve tahrîkiyle dîvân-ı âlîye arzuhâl takdîmiyle kethudâ-yı mezbûrun hilâf-ı vâki‘ azlini iltimâs ve istid‘â etmemizle kethudâ-yı merkūmun hakkında olan kelimât-ı nâ-sezâ ifk ü iftirâ ve bühtân-ı azîm olup kethudâ-yı merkūmun etvâr ve harekâtından cümlemiz hoşnûd ve râzılar olup herbiri kethudâ-yı merkūmun hüsn-i hâlini ihbâr ve kethudâlıkda kemâ-kân ibkā olunmasını istid‘â ve iltimâs etmeleriyle ber-mûceb-i istid‘â merkūm Halil kemâ-fi’s-sâbık kethudâlık-ı mezkûrda ibkā olunduğu İstanbul Mahkemesi’nden huzûr. Fî 29 Receb sene [1]223.