İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 531 Hüküm no: 522 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Şehremini adlı mahalde bir adet francalacı fırını açılmasına izin verilmesinin talep edildiği Francalacı fırını Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunduğu derkenârdan müstebân iken bundan mukaddemce vâlid-i mâcid-i hazret-i cihân-bânî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve Kethudâ-yı sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded ve Beykoz civârında Kâğıdhâne nâm mahâlde bir aded cem‘an altı aded francalacı fırınlarının küşâdıyla on üç adede iblâğı husûsuna irâde-i seniyye ta‘alluk eylediğine mebnî şeref-yâfte-i sudûr olan fermân-ı âlî-şân mûcebince küşâdına ruhsat verilmiş olup ve işbu küşâdı istid‘â olunan İstanbul’da Şehremîni nâm mahâlde kâin francalacı fırını dahi mukaddemâ bâ-irâde-i aliyye mesdûd olan fırınlara dâhil olup lâkin fırın-ı merkūm mutasarrıfları işbu ashâb-ı arzuhâl şâyân-ı inâyet olmalarıyla zikr olunan fırının rahmeten küşâdı husûsu re’y-i rezîn-i âsafânelerine menût olduğu İstanbul Mahkemesi’nden huzûr. Fî 5 Ş sene [1]223.