İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 532 Hüküm no: 523 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeplerin Erzurum tarafından İstanbul’a getirdikleri kızıl koyun tabir etdikleri Karaman koyunlarının eti, yağı ve sakatatlarının fiyatıyla alakalı kasap esnafıyla anlaştıkları Kızıl ağnâm Ma‘rûz Sekene-i Dârü’s-Saltanati’l-Aliyye’nin tevsî‘-i dâire-i ma‘âşları’çün bu esnâda Erzurum cânibinden Âsitâne-i aliyye’ye elli altı bin sekiz yüz elli re’s mikdârı kızıl koyun ta‘bîr olunur Karaman ağnâmı sevk ve tesyîr eden celebândan Abdülhay Beyzâde Sadullah Bey ve Erzurumî Ali Alemdâr b. Hüseyin ve Mirdise [Mirdesi] Aşîreti’nden Ali Beyzâde Mehmed Bey nâm kimesne meclis-i şer‘-i münîrde Dergâh-ı âlî kapıcıbaşılarından hâlâ hâssa kasabbaşısı izzetlü Mustafa kulları hâzır olduğu hâlde Kassâbân Kethudâsı Ahmed Ağa ve ustalarından el-Hâc Hafız Mehmed Emin ve es-Seyyid el-Hâc Osman ve Abdulkadir ve es-Seyyid Molla Hasan ve Süleyman ve Hacı Osman ve sâirleri muvâcehelerinde işbu sene-i mübârekede mahâllinde cem‘ ü tedârük ve sevk u tesyîr eylediğimiz ağnâmın herbirini sene-i sâbıkā fiyâtından ziyâde bahâ ile iştirâ olduğundan mâ‘adâ esnâ-i tarîkde dahi mesârif-i kesîrelerinden bahisle tazallüm-i hâl ve istirhâm eylediklerine binâen irâde-i aliyye buyurulduğu vech üzere celeb tâifesinin zarar ve hasardan vikāyeleri lâzımeden olmağla ibâdullâha mazarratı olmayacak vechile beher vakıyye lahmı yirmi iki paraya ve kuyruk yağının beher vakıyyesine bir para zamla kırk iki paraya ve Eylül duhûl etmiş olmağla ağnâm sakatlarını sene-i sâbıkā misillü otuz beş paraya bi’t-terâzî kat‘-ı fiyât olunup vech-i meşrûh üzere bey‘ ü şirâya tarafeyn râzılar olmalarıyla kassâbân esnâfı merkūmûn dahi ber-vech-i muharrer luhûmunu ve kuyruğunu ve sakatlarını mukāvele olunan fiyât-ı mezkûre üzere celeb tâifesi mezbûrûn ile hesâblaşıp ziyâde ve noksân mütâlebesi teklifiyle herbiri âhara rencîde etmeyip yevm-i tevzî‘inde yirmi bir gün mürûrunda yâfteleri verilip kezâlik [77a] yevm-i tevzî‘den otuz bir gün mürûrunda akçelerini tamamen edâ ve teslîm etmek üzere müte‘ahhidler olup bu vechile kat‘-ı fiyât olunduğu İstanbul Mahkemesi’nden huzûr. Fî 3 Ş sene [1]223.