İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 532 Hüküm no: 524 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Abdullah’ın vekili Kahveci Derviş Ali aleyhine açtığı iki bin beş kuruşluk alacak davasında iddiasını ispat edemediği 2.500 guruş men‘ Ma‘rûz İstanbul’da Hızırbey mahallesinde sâkin iken bundan akdem fevt olan Esirci el-Hâc Süleyman Ağa b. Abdullah’ın verâseti zevcesi Hadice Hatun bt. Abdullah ile sulbî sagīr oğlu Ali’ye ba‘de’l-inhisâr sagīr-i mezbûrun vâlidesi ve vasî-i mansûbesi sâhib-i arzuhâl mu‘arrefetü’z-zât mezbûre Hadice Hatun meclis-i şer‘-i münîrde derûn-ı arzuhâlde mezkûrü’l-ism Kahveci Derviş Ali b. Abdullah muvâcehesinde zevcim mûrisimiz müteveffâ-yı mezbûrun Mısr-ı Kahire’de ma‘lûmü’l-esâmî kimesneler zimmetlerinde bâ-defter-i müfredât alacak hukūkunu ashâbından ahz ü kabza ve bana îsâle tarafımdan gāib ani’l-meclis Ahmed Ağa b. Abdullah nâm kimesneyi mukaddemâ bi’l-verâse ve bi’l-vesâye vekîl nasb ü ta‘yîn eylediğimde ol dahi ba‘de’l-kabûli’l-vekâle zimem-i mezkûrdan iki bin iki yüz elli guruş tahsîl ve bi’l-vekâle kabz edip meblağ-ı mezbûrun iki yüz elli guruşunu vekîl-i mezbûrun ecr-i misline mahsûb olunup mâ‘adâ iki bin guruşu vekîlim gāib-i merkūm Ahmed Ağa’dan kabza ve müstakıllen kendi malım olmak üzere gāib ani’l-meclis Ahmed Efendi nâm kimesne zimmetinde alacağım olan beş yüz guruş dahi kezâlik mezbûrdan kabza ve bana îsâle işbu merkūm Derviş Ali’yi tarafımdan tevkîl etmemle ol dahi ba‘de’l-kabûli’l-vekâle meblağ-ı mezbûr iki bin guruşun bin guruşunu nakden ve mâ‘adâ bin guruşuna dahi ma‘lûmü’l-kıyye kahve kabz eyleyip ve merkūm Ahmed Efendi’de olan meblağ-ı mezbûr beş yüz guruşu dahi kezâlik nakden kabz edip ol-vechile cem‘an nakden makbûzu olan bin beş yüz guruşu kendi umûruna sarfla istihlâk edip meblağ-ı merkūm bin beş yüz guruş zimmetinde bana deyni olduğunu nâtık imzâ ve hâtemini hâvî bir kıt‘a temessük i‘tâ ve mârrü’z-zikr kahve semeni olan bin guruşu dahi bilâ-tahvîl yedinde kalmağla min-haysü’l-mecmû‘ iki bin beş yüz guruş mezbûr Derviş Ali’den bi’l-asâle ve bi’l-vesâye hâlâ taleb ederim deyü da‘vâ etdikde ol dahi cevâbında müdde‘iye-i mezbûre ber-vech-i muharrer kendiyi tevkîlini ikrâr lâkin meblağ-ı merkūm iki bin guruşu merkūm Ahmed Ağa’dan kabz etmedim deyü külliyen inkâr ve mâ‘adâ beş yüz guruşu mezbûr Ahmed Efendi’den bi’l-vekâle kabz edip makbûzumu müdde‘iye-i mezbûre Hadice Hatun’a tamamen def‘ ü teslîm eylediğimden sonra müdde‘iye-i mezbûre Hadice Hatun işbu târih-i i‘lâm senesi Saferi’l-hayr’ının altıncı günü hâlâ askerî kassâmı mevâlî-i fihâmdan fazîletlü Lütfullah Efendi huzûrunda husûs-ı mezkûru bi-aynihî benden da‘vâ ben dahi kezâlik meblağ-ı merkūm iki bin guruş kabzımı inkâr ve müdde‘iye-i merkūme isbâtdan izhâr-ı acz ve kabzımı mukırre ve mu‘terif olduğum meblağ-ı merkūm beş yüz guruşu kendiye def‘ ü teslîmimi iddi‘â husûsunda yemînimle tasdîk olunur ümenâdan olduğuma mebnî üzerime redd ü damân lâzım olmadığına bi’t-taleb bana yemîn verilip müdde‘iye-i mezbûre mu‘ârazadan men‘ olunmuşdu deyü takrîrine mutâbık kassâm-ı mûmâ-ileyhin hatmiyle mahtûm ibrâz eylediği bir kıt‘a i‘lâm-ı şer‘îsinin mazmûnunu müdde‘iye-i mezbûre münkire olduğundan mâ‘adâ bâlâda mezkûr iki bin guruş müdde‘âsına bu def‘a dahi ikāmet-i beyyineden izhâr-ı acz ve tahlîfe dahi tâlibe olmamağla müdde‘iye-i merkūme Hadice Hatun da‘vâ-yı mezkûresiyle merkūm Derviş Ali’ye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 18 Receb sene [1]223.