İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 534 Hüküm no: 525 Orijinal metin no: [77a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Artin’in kiracısı olduğu dükkânı ay sonunda tahliye edip sahipleri Fatma bt. İsmail ile Sarraf Luka’ya teslim etmesine karar verildiği Derzi dükkânı teslîmi Ma‘rûz Sâhibe-i arzuhâl mu‘arrefetü’z-zât Fatma bt. İsmail nâm hatun ile Sarrâf Luka v. Yani nâm zimmî meclis-i şer‘-i hatîrde derûn-ı arzuhâlde ismi mastûr Derzi Artin v. Abraham zimmî muvâcehesinde Hâssa Derzibaşısı el-Hâc Mehmed Ağa tarafından mürsel vekîli el-Hâc Halil Ağa hâzır olduğu hâlde İstanbul’da Bezzâzistân-ı atik kurbünde Perdahtcılar Hanı civârında Parçacılar sükûnda vâki‘ merhûm Çadırcı Hayreddin Vakfı müsakkafâtından bir bâb çukacı mahzeni ile önünde iki bâb dükkânların üç sehm i‘tibârıyla iki sehmi benim ve bir sehmi mesfûr Luka zimmînin bâ-temessük-i mütevellî bi’l-icâreteyn taht-ı tasarrufumuzda olmağla zikr olunan dükkânlardan birinde işbu mesfûr Artin zimmî şehriye yüzer para kirâ ile müşâhereten müstecirimiz olup lâkin dükkân-ı mezkûrun bize lüzûmu olmağla işbu târih-i i‘lâm şehri gāyetine izâfetle fesh-i akd-i icâre etmemizle dükkân-ı mezkûru gāyet-i şehr-i mezbûrda tahliye ve bize teslîme mesfûr Derzi Artin zimmîye tenbîh olunmak matlûbumuzdur deyü da‘vâ etdiklerinde ol dahi cevâbında müdde‘iyân-ı mesfûrânın mutasarrıf oldukları dükkân-ı mezkûrda ber-vech-i muharrer şehriye yüzer para kirâ ile müşâhereten müstecir olduğunu ikrâr lâkin dükkân-ı mezkûrda benden mukaddem müstecir olan Derzi Anparson zimmî dükkân-ı merkūma rağbet verip gedik etmekle bundan akdem hâlik oldukda sulbî kebîr oğlu işbu hâzır bi’l-meclis Avgasib zimmî gedik-i mezkûru sekiz yüz guruş semen-i medfû‘ ve makbûza bana bey‘ ben dahi iştirâ etmemle ol-vechile dükkân-ı mezkûr gediği benim mülküm olmuş olmağla hurûcdan imtinâ‘ ederim deyü takrîri üzere gedik iddi‘âsı emr-i meşrû‘ olmadığından mâ‘adâ dükkân-ı mezkûr gediği Başmuhâsebe’de ve aklâm-ı sâirede mukayyed ve mu‘teber gediklerden olmayıp ve mukaddemâ dahi dükkân-ı mezkûr bilâ-gedik olduğu mezbûre Fatma Hatun’un yedinde olup ibrâz eylediği bir kıt‘a i‘lâm-ı şer‘îden müstebân olmağla bu sûretde mesfûr Artin zimmînin gedik iddi‘âsını şer‘an ve kānûnen mu‘teber olmadığı kendiye tefhîm ve gāyet-i şehr-i mezbûrda dükkân-ı mezkûru tahliye ve müdde‘iyân-ı merkūmâna teslîme mesfûr Artin zimmîye tenbîh olunduğu İstanbul Mahkemesi’nden huzûr. Fî 29 Receb sene [1]223.