İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 536 Hüküm no: 527 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihrişah Valide Sultan Vakfı’na bağlı olarak Hasköy’de Humbaracı Kışlası karşısında bir adet francalacı fırını açılmasına izin verilmesinin talep edildiği Francalacı fırını Ma‘rûz Sâdır olan fermân-ı âlîlerine imtisâlen işbu arzuhâl ve derkenâra nazar olundukda bundan akdem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i aliyye sedd ü bend olunduğu derkenârdan müstebân iken bundan akdemce vâlid-i mâcid-i hazret-i şehriyârî cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- hazretlerinin Beylerbeyi ve Mîrgünoğlu nâm mahallerde müceddeden ihyâsına muvaffak oldukları cevâmi‘-i şerîfe ve âsâr-ı celîleleri evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve Kethudâ-yı sadr-ı âlî-i esbak merhûm İbrahim Efendi mahdûmunun Tavukpazarı nâm mahâlde bir aded ve Beykoz civârında Kâğıdhâne nâm mahâlde bir aded ve İstanbul’da Şehremîni nâm mahâlde bir aded ki cem‘an yedi aded francalacı fırınlarının küşâdıyla on dört aded[e] iblâğı husûsuna irâde-i aliyye ta‘alluk eylediğine mebnî şeref-yâfte-i sudûr olan fermân-ı âlî-şân mûcebince küşâdlarına ruhsat verilmiş olup ve işbu küşâdı istid‘â olunan Hasköy’de Humbaracı Kışlası mukābilinde kâin francalacı fırını dahi mukaddemâ bâ-irâde-i aliyye mesdûd olan fırınlara dâhil olup lâkin fırın-ı merkūm Hüdavendigār-ı esbak cennet-mekân firdevs-âşiyân Sultan Selim Han hazretlerinin vâlideleri merhûme Mihrişah Vâlide Sultan -tâbet serâhâ- hazretlerinin Eyüb-i Ensârî’de vâki‘ imâret-i âmire ve hayrât-ı sâireleri evkāf-ı şerîfesi müsakkafâtından olmağla siyâneten li’l-vakfi’ş-şerîf küşâdı husûsu re’y-i rezîn-i âsafânelerine menût olduğu İstanbul Mahkemesi’nden huzûr. Fî 7 Ş sene [1]223.