İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 537 Hüküm no: 528 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu esnafının satın aldıkları kiraz çubukları bedelinden kethudaları Halil’e olan bin üç yüz seksen dört kuruş borçlarını taksitle ödemelerine karar verildiği Çubukcu esnâfının tecîl mâddesi Ma‘rûz Âsitâne-i aliyye’de vâki‘ çubukçu esnâfının kethudâsı Halil b. Ali nâm kimesne meclis-i şer‘-i münîrde tüccârdan Bağdâdî Hacı Mehmed b. Abdullah ile esnâf-ı merkūme yiğitbaşısı Osman ve Yazıcı Mehmed Tâhir nâm kimesneler hâzır oldukları hâlde esnâf-ı merkūmenin işçi ustalarından ashâb-ı arzuhâl Şahbazoğlu Hasan ve Kuşcuoğlu Hüseyin ve Edirneli Sâlih ve Veli dâmâdı Hüseyin ve Torlak İsmail ve Küçük Arnabud Mustafa ve Âşık Hasan ve Nifli Ahmed ve şerîki Halil ve Şemsi Ali ve Badralı Mehmed Emin ve Bülbüloğlu Mustafa ve Kurdluoğlu İbrahim nâm kimesneler muvâcehelerinde işbu yedimde olup bin iki yüz yirmi iki senesi Zilka‘detü’ş-şerîfe’sinin yirminci günü târihiyle muvarrah İstanbul Kādısı sâbık Dürrîzâde sa‘âdetlü fazîletlü Mehmed Hidayetullah Efendi’nin hâtemini hâvî bir kıt‘a i‘lâm-ı şer‘î nâtık olduğu üzere hâzır-ı mezbûr Bağdâdî Hacı Mehmed’den iştirâ ve kabz eylediğim ma‘lûmü’l-aded kirâs çubuklarımı işçi ustaları merkūmûn herbiri âharların zimmetlerine lâzım gelen meblağa kefîl ve zâmin olmak üzere yedimden ale’l-iştirâki’s-seviyy iştirâ ve kabz eyledikleri bâ-defter-i müfredât aded ve fiyâtı beynimizde ma‘lûm kirâs çubukları semenlerinden cem‘an zimmetlerinde bâkī beş bin dokuz yüz kırk sekiz guruş bana deynleri olup hâlen ve def‘aten edâya kudretleri olmamağla târih-i mezbûrdan her beş ay tamamında bin dokuz yüz seksen ikişer buçuk guruş yirmişer akçesini verip ol-vechile on beş ay tamamına dek üç taksîtle mecmû‘unu bana edâ ve îfâ etmek üzere medyûnlarım mezbûrûnu tecîl ve imhâl etmemle onlar dahi ber-vech-i muharrer ol-mikdâr guruş zimmetlerinde bana deynleri olduğunu ikrâr ü i‘tirâf ve taksîtleri hulûlünde edâ ve teslîme herbiri müte‘ahhid oldukdan sonra meblağ-ı mezbûrdan zahr-ı i‘lâmda mukayyed olduğu üzere bin üç yüz seksen dört guruşu ceste ceste bana def‘ ü teslîm etmeleriyle ol-vechile taksît-i evvelden bâkī kalan beş yüz doksan sekiz buçuk guruş yirmi akçesini hâlâ ve mâ‘adâsını taksîtleri hulûlünde bana edâya tâife-i merkūmûna tenbîh olunmak matlûbumdur deyü takrîr-i meşrûhuna mutâbık ve kādı-i mûmâ-ileyhin hatmiyle mahtûm ibrâz eylediği bir kıt‘a i‘lâm-ı şer‘îsinin mazmûnunu tâife-i mezbûrûn inkâr etmeleriyle müdde‘î-i merkūm Halil ber-minvâl-i meşrûh müdde‘âsını ve mazmûn-ı i‘lâm-ı mezkûru mahâllinde lede’t-tezkiye adl ve makbûlü’ş-şehâde idükleri ihbâr olunan esnâf-ı merkūmeden İstanbul’da Şehzâdebaşı’nda sâkin Feyzullah Usta b. Lütfullah ve Alacahamam’da sâkin Ebûbekir Usta b. Hasan nâm kimesneler şehâdetleriyle tâife-i merkūmûn muvâcehelerinde vech-i vecîh-i şer‘î üzere isbât etmeğin mûcebince bâlâda mezkûr taksît-i evvelden bâkī kalan beş yüz doksan sekiz buçuk guruş yirmi akçesi hâlâ ve mâ‘adâsını taksît-i sânî ve sâlis hulûlünde vech-i meşrûh üzere müdde‘î-i merkūm Kethudâ Halil’e edâ ve teslîme tâife-i mezbûrûna tenbîh olunduğu İstanbul Mahkemesi’nden huzûr. Fî 25 Receb sene [1]223.