İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 542 Hüküm no: 534 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Halil’in yirmi sene önce merhume Ayşe bt. Mehmed’den dokuz yıllık hizmetinin karşılığında ecr-i mislden bin seksen kuruş alacağı olduğu iddiasıyla merhumenin çocukları aleyhine açtığı alacak davasının meşru olmadığı Mürûr-ı zaman ile men‘ Ma‘rûz Sâhibe-i arzuhâl mu‘arrefetü’z-zât Fatma bt. Halil nâm hatun meclis-i şer‘-i münîrde derûn-ı arzuhâlde isimleri mezkûr zu‘amâdan Mehmed Nuri Ağa b. Ahmed ve kız karındaşı mu‘arrefetü’z-zât Zeliha Hatun muvâcehelerinde mezbûrânın vâlideleri olup işbu târih-i i‘lâmdan yirmi sene mukaddem vefât eden Âişe bt. Mehmed nâm hatun hayatında talebiyle ücret kavlinsiz dokuz sene menzilinde kendüye hizmet etmemle müddet-i mezkûrede ecr-i mislim olan şehriye onar guruşdan cem‘an bin seksen guruşu almadan merkūme Âişe Hatun fevt ve tereke-i vâfiyesini evlâdı mezbûrâna bi’l-verâse zabt ve vaz‘-ı yed etmeleriyle ol târihden beri yirmi seneyi mütecâviz müddetde ben ve mezbûrân Mehmed Nuri Ağa ve Zeliha Hatun cümlemiz Âsitâne-i aliyye’de sâkinler olup müddet-i merkūmede husûs-ı mezkûru mezbûrândan da‘vâ mümkün iken bilâ-özr sükût etmişidim. El-hâletü hâzihî ecr-i mislim olan meblağ-ı mezbûru merkūmânın vâzı‘ayi’l-yed oldukları tereke-i müteveffât-ı mezbûreden taleb ederim deyü eylediği da‘vâsını mezbûrân Mehmed Nuri Ağa ve Zeliha Hatun’dan herbiri külliyen inkârlarından mâ‘adâ müdde‘iye-i merkūmenin takrîr-i meşrûhu üzere yirmi sene bilâ-özr terk ve sükût eylediğini mu‘terife iken bu makūle on beş sene bilâ-özr terk olunan da‘vâ bilâ-emr mesmû‘a olmadığı kendüye tefhîm olunduğu İstanbul Mahkemesi’nden huzûr. Fî 8 Ş sene [1]223.