İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 548 Hüküm no: 541 Orijinal metin no: [79a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toros v. Avakim’in vârislerinin kendilere ait olan menzile müdahale ettiği iddiasıyla Nargileci Agop aleyhine açtıkları davada iddialarını ispat edemedikleri Kocamustafapaşa’da menzil mâddesi Ma‘rûz İstanbul’da Kocamustafapaşa mahallesinde mütemekkin iken işbu târih-i i‘lâmdan on altı sene mukaddem hâlik olan Toros v. Avakim nâm zimmînin sulbî kebîr oğlu Kirkor nâm zimmî ile hâlik-i mesfûrun diğer oğlu olup kendiden sonra hâlik olan Asvador zimmînin sulbî kebîr oğlu Aleksan zimmî ve sulbî kebîre kızları şahısları mu‘arrefe Lusik ve Armavani Nasrâniyeler ile hâlik-i evvel mesfûrun zevcesi Antran bt. Norsis Nasrâniyeden herbiri meclis-i şer‘-i hatîrde zikir-i âtî menzile bi’l-icâreteyn mutasarrıf ve vâzı‘ü’l-yed olan derûn-ı arzuhâlde mastûrü’l-ism Nargileci Agop v. Serope nâm zimmî muvâcehesinde İstanbul’da Sulumanastır fukarâsının levazımına mevkūfe vakfın müsakkafâtından olup mârrü’z-zikr Kocamustafapaşa mahallesinde kâin ma‘lûmü’l-hudûd bir bâb menzilin nısfı mersûme Antran benim ve nısf-ı şâyi‘-i âharı dahi zevcim hâlik-i evvel mesfûr Toros zimmînin bi’l-icâreteyn iştirâken tasarrufumuzda iken benimle zevcim mesfûr sağlığında bin yüz doksan sekiz senesinde Serpohi bt. Serkiz nâm Nasrâniyeden karz aldığımız üç yüz guruş deynimiz mukābelesinde her ne zaman deyn-i mezkûru edâ eder isen menzil-i mezkûru bize redd-i ferâğ etmek üzere mersûme Serpohi Nasrâniyeye bâ-re’y-i [79b] mütevellî ferâğ ve kasr-ı yed eylediğimizde Nasrâniye-i mersûme dahi ol şartla kabûl eyledikden sonra on üç sene mürûrunda Nasrâniye-i mersûme dahi menzil-i mezkûru Artin v. Nazaret zimmîye kezâlik bâ-re’y-i mütevellî ferâğ ve kasr-ı yed edip ve mesfûr Artin zimmî dahi bin iki yüz on beş senesinde benim ve gerek evlâd-ı mersûmûnun iznimizle işbu mersûm Nargileci Agop zimmîden yedi yüz guruş karz alıp dört yüz guruşunu bize teslîm ve mâ‘adâ üç yüz guruşuna emrimizle mesfûre Serpohi Nasrâniyeye verdiği meblağ-ı merkūm üç yüz guruşa takas ve mahsûb ile istifâ ve menzil-i mezkûru bâ-re’y-i mütevellî mersûm Agop zimmîye ferâğ ve kasr-ı yed etmekle ol dahi tefevvüz ve kabûl edip ol-vechile menzil-i mezkûr meblağ-ı merkūm yedi yüz guruş mukābelesinde mersûm Agop zimmî uhdesinde ferâğ bi’l-vefâ’ tarîkıyla olmağla hâlâ meblağ-ı merkūm yedi yüz guruşu yedimizden ahz birle menzil-i mezkûru bâ-re’y-i mütevellî bize ferâğ ve kasr-ı yed etmek üzere mersûm Agop zimmîye tenbîh olunmak matlûbumuzdur deyü vakf-ı merkūm mütevellîsi Agop zimmî hâzır olduğu hâlde da‘vâ etdiklerinde mersûm Agop zimmî dahi cevâbında hâmiş-i arzuhâlde mastûr defter-i vakıfdan muhrec derkenâr ve işbu yedimde olan temessük mantûklarınca hâlik-i evvel-i mersûm Toros zimmî sağlığında zevcesi müdde‘iye-i mersûme Antran Nasrâniye ile ma‘an bin yüz doksan sekiz senesinde menzil-i mezkûru mesfûre Serpohi Nasrâniyeye bâ-re’y-i mütevellî ferâğ ve kasr-ı yed eylediklerinden sonra ol dahi on üç sene mürûrunda mersûm Artin zimmîye kezâlik bâ-re’y-i mütevellî ferâğ ve kasr-ı yed ve mersûm Artin zimmî dahi dört sene mürûrunda bana kezâlik bâ-re’y-i mütevellî ferâğ ve kasr-ı yed ben dahi tefevvüz ve kabûl eylediğimden sonra bin iki yüz on sekiz senesinde işbu müdde‘iyûn-ı mersûmûn Mahmudpaşa Mahkemesi’nde nâibü’ş-şer‘ olan mevâlî-i i‘zâmdan Hafîdzâde fazîletlü Mehmed Said Efendi huzûrunda menzil-i mezkûru vech-i meşrûh üzere benden da‘vâya tasaddî ve ol-vechile beynimizde ba‘de’l-münâza‘a beynimiz tevfîk ve ıslâh olunup ben malımdan rızâmla mesfûrûna teberru‘an dört yüz guruş verip onlar dahi ba‘de’l-kabz da‘vâ-yı mezkûrelerinin kat‘a aslı olmadığını herbiri ikrâr ü i‘tirâf edip menzil-i mezkûra ve bi’l-cümle hukūk-ı şer‘iyeye ben dahi teberru‘an medfû‘um olan meblağ-ı merkūmun istirdâdına müte‘allika âmme-i da‘vâdan herbirimiz âharın zimmetini ibrâ ve iskāt ve herbirimiz âharın ibrâsını kabûl etmişidik deyü mazmûnu takrîr-i meşrûhuna mutâbık bir kıt‘a hüccet-i şer‘iye ibrâzıyla eylediği def‘ini lede’t-tezkiye adl ve makbûlü’ş-şehâde idikleri ihbâr olunan Muhzır Ali Çelebi b. ( ) ve Muhzır Mehmed Çelebi b. ( ) nâm kimesneler şehâdetleriyle müdde‘iyûn-ı mersûmûn muvâcehelerinde vech-i vecîh-i şer‘î üzere isbât etmeğin mûcebiyle müdde‘iyûn-ı mersûmûn da‘vâ-yı mezkûreleriyle mersûm Agop zimmîye bî-vech mu‘ârazadan men‘ olunup menzil-i mezkûr kemâ-fi’s-sâbık mesfûr Agop zimmî tasarrufunda ibkā olunduğu İstanbul Mahkemesi’nden huzûr. Fî 12 Ş sene [1]223.