İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 552 Hüküm no: 543 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü esnafının kendi dükkânlarının yakınına tütüncü dükkânı açarak kârlarının azalmasına sebep olduğu iddiasıyla Süleyman b. Ahmed aleyhine açtıkları davanın meşru olmadığı Tütüncü gediği mâddesi Ma‘rûz Ashâb-ı arzuhâl İstanbul’da Langa-i kebîr nâm mahâlde tütüncü esnâfından İstefan v. Bogos ve Bağdisar v. Markos ve Haçar v. Serkiz ve Mikâil v. Vartan ve Ovannes v. Kirkor ve Kasbar v. Agop ve Melkon v. Manil ve Zakar v. Karabet nâm zimmîler meclis-i şer‘-i hatîrde mârrü’z-zikr Langa’da Kâtib Kasım mahallesinde kimesnenin gediği olmayan dükkânı istîcâr birle bâ-fermân-ı âlî derûnuna tütüncü gediği nakleden derûn-ı arzuhâlde mezkûrü’l-ism Süleyman b. Ahmed muvâcehesinde esnâf-ı merkūme kethudâsı İbrahim Ağa ve yiğitbaşı ve sâir mazbûtü’l-esâmî duhân tüccârı hâzır oldukları hâlde mezbûr Süleyman mahâll-i mezkûrda dükkânlarımıza karîb bundan akdem istîcâr ve küşâd eylediği dükkânda kimesnenin gediği olmamağla mahâll-i âharda mâlik olduğu mu‘teber tütüncü gediğini hasbe’l-iktizâ nakl şurût-ı nizâmımızdan olduğunu kethudâ ve esnâfımız ustalarının ihbârlarına mebnî bâ-i‘lâm ve bâ-fermân-ı âlî müceddeden küşâd eylediği dükkân-ı merkūma nakl ve hâlâ derûnunda tütüncülük edip lâkin dükkân-ı mezkûr bizim dükkânlarımıza karîb olduğuna binâen müşterîlerimizi celb ederek bizim kâr u kisbimize noksân târî olmasına sebeb olmağla mezbûr Süleyman dükkân-ı mezkûru sedd ü bend birle nakleylediği gediğini mahâll-i âhara nakleylesin deyü takrîr-i meşrûhları üzere tasaddî eyledikleri da‘vâları şer‘-i şerîfe muhâlif olduğundan mâ‘adâ bu makūle hasbe’l-iktizâ gedik nakli şurût-ı nizâmlarından olduğunu mu‘terifler iken mücerred kisbimize noksân târî olur deyü gediğini âhar mahalle nakleylesin demeleri mugāyir-i şurût-ı nizâm olmağla bir vechile istimâ‘a mesâğ olmayıp merkūm Süleyman’a suâl dahi teveccüh etmemekle bî-vech mu‘ârazadan men‘ olundukları İstanbul Mahkemesi’nden huzûr. Fî 4 Şa‘bân sene [1]223.