İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 553 Hüküm no: 544 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Süleyman’ın satın aldıktan sonra ayıplı çıkan zenci cariyeyi satıcısı olan Abdullah Ağa’ya iade ettiği onun da aynı cariyeyi ayıplarıyla birlikte dört yüz elli beş kuruşa Esirci Hasan’a sattığı Zenciye câriye mâddesi Ma‘rûz Sâhib-i arzuhâl el-Hâc Süleyman b. Ali nâm kimesne meclis-i şer‘-i münîrde derûn-ı arzuhâlde mezkûrü’l-ism Abdullah Ağa b. el-Hâc Abdullah muvâcehesinde esirci tâifesinden Hasan b. Veliyüddin nâm kimesne hâzır olduğu hâlde târih-i i‘lâmdan üç buçuk ay mukaddem esirci-i hâzır-ı merkūm vesâtetiyle cemî‘ uyûbdan sâlime olmak üzere mezbûre Abdullah Ağa’dan dört yüz seksen beş guruş semen-i medfû‘ ve makbûza iştirâ ve kabz eylediğim işbu hâzıratü bi’l-meclis orta boylu açık kaşlı zenciyyetü’l-asl bir re’s cariyenin yedi aylık hamli olduğu zâhir ve ol-vechile mu‘ayyebe ve ayb-i mezkûr şirâ târihinden kadîm ve beyne’t-tüccâr noksân-ı semen îcâb eder uyûbdan olmağla redd-i semen ve kabz-ı mebî‘ olunmak matlûbumdur deyü kābile ihbârıyla teveccüh-i husûmet bulundukdan sonra da‘vâ eylediğimde beynimize muslihûn tavassutuyla merkūm Abdullah Ağa ile bi’t-terâzî bey‘-i mezkûru fesh ve ikāle birle câriye-i merkūmeyi merkūm Abdullah Ağa’ya redd ü teslîm ol dahi makbûzu olan semen-i merkūmu bana redd ü teslîm ve herbirimiz ber-vech-i muharrer ahz ü kabz ve istifâ-i hak eyledik dediğini merkūm Abdullah Ağa ba‘de’t-tasdîk ol dahi câriye-i merkūmeyi cemî‘ uyûbuyla hâzır-ı merkūm Esirci Hasan’a dört yüz elli beş guruş semen-i medfû‘ ve makbûza bey‘-i kat‘î ile bey‘ ve teslîm eylediğinde mezbûr Hasan dahi ber-vech-i muharrer iştirâ ve tesellüm ve kabz ü kabûl edip bu vechile kat‘-ı münâza‘a eyledik deyü ikrâr ve tasdîkleri İstanbul Mahkemesi’nden huzûr. Fî 26 Receb sene [1]223.