İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 554 Hüküm no: 545 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi esnafından Hüseyin Ağa ile Ali Usta’nın ortak oldukları çörekçi dükkânı gediğini nöbetleşe kullanmak üzere anlaştıkları Çörekci muhâyâsı Ma‘rûz Çörekci esnâfından el-Hâc Hüseyin Ağa b. Hüseyin nâm kimesne meclis-i şer‘-i münîrde yine esnâf-ı mezbûreden es-Seyyid Ali Usta b. Ahmed muvâcehesinde İstanbul’da Parmakkapı civârında İskilib Hanı ittisâlinde kâin bir bâb çörekçi dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yetmiş sehmi benim ve elli sehmi mezbûr es-Seyyid Ali Usta’nın bi’l-iştirâk yedimizde mülkümüz olmağla bundan akdem âlât-ı lâzıme-i mezkûreyi on altı ay yirmi dört gün ben müstakıllen zabt ü isti‘mâl ve ba‘dehû bir sene-i kâmile mezbûr es-Seyyid Ali Usta zabt etmek üzere ma‘rifet-i şer‘le bâ-i‘lâm-i şer‘î muhâyât olunmuş idi el-hâletü hâzihî işbu târih-i i‘lâm günü benim müddet-i mezkûrem tamam olup nevbet-i tasarruf mezbûr es-Seyyid Ali Usta’ya gelmekle işbu târihden bir sene-i kâmile müstakıllen zabt ü isti‘mâl için mezbûr es-Seyyid Ali Usta’ya âlât-ı lâzıme-i mezkûreyi teslîm eylediğimde ol dahi ber-vech-i muharrer muhâyât tarîki üzere ahz ü kabz eyledi dediğini merkūm es-Seyyid Ali Usta tasdîk ve sene-i merkūme hitâmında müşterîki merkūm el-Hâc Hüseyin Ağa’ya teslîme ta‘ahhüd eylediği tescîl ve İstanbul Mahkemesi’nden huzûr. Fî 23 Receb sene [1]223.